कांग्रेसले शुक्रबार परासीमा पहिलोपटक क्षेत्रीय सम्मेलन गर्दै, महामन्त्री थापाले सम्बोधन गर्ने

दैनिक 24 खबर

२०८१ चैत्र ६, बिहिबार प्रकाशित (१ हफ्ता अघि) २८२ पाठक संख्या

मोहन पौडेल
परासी, ७ चैत । नेपाली कांग्रेस क्षेत्र नं.२ पश्चिम नवलपरासीले पहिलो पटक क्षेत्रीय सम्मेलन गर्ने भएको छ । विधानत पार्टीका सबै तहले प्रत्येक वर्ष सम्मेलन गर्नुपर्ने व्यवस्था गरिएपछि क्षेत्रीय समितिले पनि पहिलो पटक सम्मेलन गर्न लागेको कांग्रेसले जनाएको छ ।
यही चैत ८ गते शुक्रबार सदरमुकाम परासीस्थित होटल सिद्धार्थ पार्क रिजेन्सीमा प्रतिनिधिसभा स्तरीय सम्मेलन हुन लागेको नेपाली कांग्रेस क्षेत्र नं.२ का सभापति माधव प्रसाद पाण्डेले जानकारी दिनुभयो । सम्मेलनको पार्टीका केन्द्रीय महामन्त्री गगन कुमार थापाले उद्घाटन गर्ने कार्यक्रम रहेको छ ।
पार्टीका केन्द्रिय उपसभापति पूर्ण बहादुर खड्काले सम्मेलन उद्घाटन गर्ने कार्यक्रम तय भएपनि खड्का अचानक अस्वस्थ भएपछि अन्तिम समयमा उहाँ आउने कार्यक्रम रद्द भएको क्षेत्रीय सभापति पाण्डेले बताउनुभयो । सम्मेलनमा पार्टीका केन्द्रीय सदस्यहरु देवेन्द्रराज कँडेल, विनोद चौधरी लगायत अन्य केन्द्रीय सदस्यहरुको पनि सहभागिता रहने आयोजकले जनाएको छ ।
सम्मेलनमा करिब सात सय क्षेत्रीय प्रतिनिधिसहित पार्टीका नेता, कार्यकर्ता तथा शुभेच्छुकसहित एक हजार बढीको उपस्थिति रहने क्षेत्रीय सचिव भरत पौडेलले बताउनुभयो ।
सम्मेलनको बन्दसत्रमा क्षेत्रीय समितिको वार्षिक, सांगठनिक र राजनीतिक प्रतिवेदनहरु पेश गर्ने कार्यक्रम रहेको क्षेत्रीय समितिकी प्रवक्ता मञ्जु गैरे बस्यालले जानकारी दिनुभयो । यो पार्टीको आन्तरिक सम्मेलन भएकोले अहिलेसम्मका कार्यहरुको गहन समिक्षा र भावी योजना समेत निर्माण गरिने उहाँले बताउनुभयो ।