असल कृषि अभ्यास, पोषण तथा जलवायु स्मार्ट कृषि प्रवद्र्धन सम्बन्धी प्राविधिक तालिम सम्पन्न

मोहन पौडेल

२०८१ मंसिर १, शनिबार प्रकाशित (९ महिना अघि) ४१३ पाठक संख्या

परासी, १ मंसिर । असल कृषि अभ्यास, पोषण तथा जलवायु स्मार्ट कृषि प्रवद्र्धन सम्बन्धी तीन दिवसीय अभिमुखीकरण तथा प्राविधिक तालिम पश्चिम नवलपरासीमा सम्पन्न भएको छ । आईडिईको आर्थिक सहयोगमा एकिकृत हातेमालो समाज नेपालको आयोजनामा सुनवलस्थित रिवर्न होटलमा सञ्चालित उक्त तालिम शुक्रबार सम्पन्न भएको हो ।
तालिममा पोषण मार्फत जीवन रुपान्तरण परियोजना लागू भएक नवलपरासीको सुस्ता,प्रतापपुर, सरावल र पाल्हीनन्दन गाउँपालिकाका १३ जना समुदाय व्यवसाय सहजकर्ता(सिबीएफ)हरुको सहभागिता रहेको थियो । तालिममा पोषण, कृषि खेती, पशुपालन लगायतका प्राविधिक तालिमका साथै सिबीएफहरुको भूमिका लगायतका विषयमा प्रशिक्षण प्रदान गरिएको एकिकृत हातेमालो समाज नेपाल नवलपरासीका तथ्यांक अधिकृत मीन रानाले जानकारी दिनुभयो ।
तीन दिनसम्म सञ्चालित उक्त तालिममा स्वास्थ्य कार्यालय नवलपरासीका प्रमुख गौरव ढकालले पोषण, सरसफाइ र भिटामिन,कृषि ज्ञान केन्द्र नवलपरासीका नविन गैरे, उमाशंकर पौडेल र नवराज घिमिरेले असल कृषि खेती,होम गार्डेन,आईपिएम,वातावरणीय अनुकुल कृषि खेती,नर्सरी व्यवस्थापन, खाद्य सुरक्षा सम्बन्धि तथा भेटेरेनरी तथा पशु सेवा विज्ञ कार्यालयका डा. विभुती सिंहले कुखुरापालन तथा पशुपालनको विषयमा प्रशिक्षण दिनुभएको थियो ।
यस्तै संस्थाको तर्फबाट सिनियर सुपरीवेक्षक अच्युतराज खनाल,आईडिईका कार्यक्रम संयोजक विजय पौडेलले सिबिएफको भूमिका,सियानका तथ्यांक अधिकृत मीन रानाले सहजकर्ताहरुलाई व्यवसाय,बिक्री र बजारीकरण एवं रामाशंकर पाण्डेले झोलमोल लगायतका विषयमा प्रशिक्षण प्रदान गर्नुभएको संस्थाका वास सहजकर्ता दीपेश सिग्देलले बताउनुभयो ।

सियानका कार्यकारी निर्देशक भाष्कर कुमार अधिकारीको अध्यक्षतामा भएको तालिम समापन कार्यक्रममा निर्देशक अधिकारीले तालिमपछि सहजकर्ताहरुको समुदायप्रति जिम्मेवारी थपिएको बताउँदै समुदायमा सेवाको भावनाले काम गर्न आग्रह गर्नुभयो । आफ्नो स्थानीय क्षेत्रहरुमा सरसफाइ र कृषि सम्बन्धि सहजीकरण गर्न आग्रह गर्दै उहाँले शुभकामना व्यक्त गर्नुभएको थियो । तालिमको सञ्चालन तथा सहजीकरण फिल्ड सुपरभाईजर स्मृति ढकाल र श्वेता कलवारले गर्नुभएको थियो ।