लेखापढी कानून व्यवसायी एसोसिएसनको ३१ औँ स्थापना दिवसमा नवलपरासीमा दीप प्रज्वलन

मोहन पौडेल

२०८२ आश्विन २८, मंगलबार प्रकाशित (७ घण्टा अघि) ६५ पाठक संख्या

परासी, २८ असोज । नेपाल लेखापढी कानून व्यवसायी एसोसिएसनको ३१ औँ स्थापना दिवसको अवसरमा पश्चिम नवलपरासी शाखाले दीप प्रज्ज्वलन गरेको छ । परासीस्थित जिल्ला कार्य समितिको कार्यालय परिसरमा आज साँझ दिप प्रज्ज्वलन गरी स्थापना दिवस मनाइएको हो ।
उक्त अवसरमा एसोसिएसनका केन्द्रीय उपाध्यक्ष अर्जुन बहादुर क्षेत्रीले नेपाल लेखापढी कानून व्यवसायी एसोसिएसनले विगत तीन दशकदेखि लेखापढी कानून व्यवसायीहरुको पेशागत अधिकार,मर्यादा र सीप विकासमा निरन्तर क्रियाशील रहेको बताउँदै थप संस्थागत विकास तथा सुदृढीकरणका लागि शुभकामना व्यक्त गर्नुभयो ।
जेनजी आन्दोलनको सन्देशलाई मध्यनजर गर्दै लेखापढी कानून व्यवसायलाई थप मर्यादीत, विश्वसनीय र जवाफदेही पेशाको रुपमा स्थापित गर्नुपर्ने आवश्यकता रहेको भन्दै उपाध्यक्ष क्षेत्रीले सबै व्यवसायीलाई ईमान्दारीतापूर्वक सेवा गर्न आग्रह गर्नुभयो ।
एसोसिएसनका जिल्ला सचिव गणेश रेग्मीेले मालपोत,नापी लगायतका जग्गा प्रशासनिक क्षेत्र र अर्धन्यायिक निकायको मातहतमा रहेर लेखापढी व्यवसायीले अनुशासन र पारदर्शी ढंगले सेवा प्रदान गर्दै आएको बताउनुभयो । छरिएर रहेका लेखापढी व्यवसायीलाई संगठीत गर्दै संस्थाले पेशागत दक्षता अभिवृद्धिका कामहरु समेत गर्दै आएको उहाँले उल्लेख गर्नुभयो ।
संस्थाका कोषाध्यक्ष ऋषि भट्टराईले लेखापढी व्यवसायमा चुनौतीहरु थपिँदै गएको भन्दै इमान्दारीता र जवाफदेही ढंगबाट व्यवसाय गर्नुपर्नेमा जोड दिनुभयो । नेपाल लेखापढी कानून व्यवसायी एसोसिएसन वि.स.२०५२ सालमा स्थापना भएको थियो ।