विभिन्न प्रतियोगितामा उत्कृष्टता हासिल गर्न सफल विद्यार्थीलाई सुनवल युनाइटेडको सम्मान

मोहन पौडेल

२०८३ आश्विन १९, सोमबार प्रकाशित (३ घण्टा अघि) ३१ पाठक संख्या

परासी, १९ असोज । विभिन्न प्रतियोगितामा उत्कृष्ट प्रदर्शन गर्दै प्रदेश तथा जिल्लास्तरमा विद्यालयको गौरब बढाउन सफल सुनवल युनाइटेड अंग्रेजी आवासीय माध्यमिक विद्यालयका विद्यार्थी सम्मानित भएका छन् ।
सुनवल–४ स्थित विद्यालयले विभिन्न प्रतियोगितामा प्रथम स्थान हासिल गरेका विद्यार्थीलाई एक कार्यक्रम आयोजना गरी सम्मान गरेको हो । विद्यालयका प्रिन्सिपल धनराज चापागाईंको अध्यक्षतामा आयोजित कार्यक्रममा विजेता विद्यार्थीलाई टीका तथा खादा लगाएर सम्मान गरिएको थियो ।
गुल्मीमा गत असोज १ र २ गते सम्पन्न प्रदेशस्तरीय स्क्राबल प्रतियोगितामा प्रथम स्थान हासिल गर्न सफल विद्यार्थी बिनिता वर्मालाई सम्मान गरिएको थियो । त्यस्तै, प्याब्सन नवलपरासीको आयोजनामा असोज ११ गते सम्पन्न जिल्लास्तरीय स्पेलिङ बी प्रतियोगितामा प्रथम भएका मान्भी न्यौपाने, मेरिसा ढकाल र एलेक्स पुनलाई पनि सम्मान गरिएको विद्यालयले जनाएको छ ।

 

सम्मानित विद्यार्थीलाई बधाई तथा शुभकामना दिँदै प्रिन्सिपल चापागाईंले विद्यार्थीको अथक मेहनत, निरन्तर प्रयास र लगनशीलतासँगै सम्बन्धित टिमको निगरानी, प्रशिक्षण तथा मार्गदर्शनका कारण विद्यालयले प्रतियोगितामा उत्कृष्ट नतिजा हासिल गर्न सफल भएको बताउनुभयो ।
उहाँले विद्यार्थीको क्षमता पहिचान गरी पढाइसँगै अतिरिक्त क्रियाकलापमा समेत अब्बल बनाउने उद्देश्यले विद्यालयले विभिन्न गतिविधिलाई प्राथमिकता दिँदै आएको बताउनुभयो । विद्यार्थीको सफलता व्यक्तिगत उपलब्धि मात्र नभई विद्यालय, अभिभावक तथा सम्पूर्ण सुनवल क्षेत्रकै गौरव भएको उहाँको भनाइ थियो ।
सुनवल युनाइटेडका विद्यार्थीहरूले पछिल्लो समय अन्तर्राष्ट्रिय, राष्ट्रिय, प्रदेश, जिल्ला तथा नगरस्तरीय विभिन्न अतिरिक्त क्रियाकलापका प्रतियोगितामा निरन्तर सफलता हासिल गर्दै आएका छन् । पछिल्लो उपलब्धिले विद्यालयमा अतिरिक्त क्रियाकलापतर्फ विद्यार्थीको आकर्षण र प्रतिस्पर्धात्मक क्षमता थप बढाएको विद्यालयको भनाइ छ ।
कार्यक्रममा सम्मानित विद्यार्थीहरू अध्ययनरत कक्षाका विद्यार्थी, विद्यालयको ईसीए टिम, शिक्षक तथा सम्बन्धित व्यक्तिहरूको सहभागिता रहेको थियो ।