सालबासमा मोटरसाईकल दुर्घटना हुँदा एक जनाको मृत्यु, एक जना घाईते

दैनिक 24 खबर

२०८१ माघ १८, शुक्रबार प्रकाशित (१ साल अघि) ५३२ पाठक संख्या

मोहन पौडेल
परासी, १८ माघ । पूर्वपश्चिम राजमार्ग अन्र्तगत पश्चिम नवलपरासीको सरावल–१ सालबासमा आज साँझ मोटरसाईकल दुर्घटना हुँदा एक जनाको मृत्यु भएको छ भने अर्का एक जना घाईते भएका छन् ।
मृत्यु हुनेमा मोटरसाईकलमा सवार रुपन्देहीको शुद्धोधन गाउँपालिकाको अमहवाका २८ वर्षीय कमल परियार रहेको जिल्ला प्रहरी कार्यालय नवलपरासीका सूचना अधिकारी प्रहरी नायव उपरीक्षक रेशम बोहराले जानकारी दिनुभयो ।
दुर्घटनामा परी गम्भीर घाईते परियारको लुम्बिनी सिटी अस्पताल बुटवलमा उपचारको क्रममा राति नै निधन भएको डिएसपी बोहराले बताउनुभयो । मोटरसाईकल चालक नुवाकोट जिल्ला लिखु–३ का २९ वर्षीय गोपाल लोहनी गम्भीर घाईते छन् । उनको पनि सोही अस्पतालमा उपचार भईरहेको प्रहरीले जनाएको छ ।
आज साँझ पौने सात बजेको समयमा पूर्वबाट पश्चिमतर्फ आउँदै गरेको प्रदेश नं.३–०२–००६ प ९८३६ नम्बरको मोटरसाईकल सालबासमा आफै अनियन्त्रित भई सडकको बीचमा रहेको डिभाईडरमा ठोक्किँदा उक्त दुर्घटना भएको डिएसपी बोहराले बताउनुभयो ।