राष्ट्रसेवक साकोसद्धारा रेडक्रस मार्फत विपद् प्रभावितलाई राहत सामग्री हस्तान्तरण

दैनिक 24 खबर

२०८१ आश्विन २२, मंगलबार प्रकाशित (१ महिना अघि) २३७ पाठक संख्या

मोहन पौडेल
परासी, २२ असोज । राष्ट्रसेवक बचत तथा ऋण सहकारी संस्था लिमिटेड(साकोस) रामग्राम–३ नवलपरासीले विपद् प्रभावितका लागि राहत सामग्री सहयोग गरेको छ । बाढी,डुबान लगायतका कारण प्रभावितहरुलाई सहकारीले नेपाल रेडक्रस सोसाईटी जिल्ला शाखा नवलपरासी मार्फत राहत सामग्री हस्तान्तरण गरेको हो ।
मंगलबार परासीमा एक कार्यक्रम गरि राष्ट्रसेवक साकोसका अध्यक्ष गणेशप्रसाद घिमिरेले विपद् प्रभावितका लागि रु २५ हजार बराबरको २७ सेट टिसर्ट र हाफप्वाईन्ट रेडक्रसका जिल्ला सभापति राजेन्द्रप्रसाद अग्रहरीलाई हस्तान्तरण गर्नुभयो ।
विपद्को समयमा सबै क्षेत्रको सहयोग र सहकार्य हुनुपर्ने आवश्यकतालाई मध्यनजर गर्दै संस्थाले आफ्नो सामाजिक उत्तरदायित्व अन्र्तगत विपद् सामग्री हस्तान्तरण गरेको सहकारीका अध्यक्ष घिमिरेले बताउनुभयो । उहाँले आगामी दिनमा पनि सहकारीले सामाजिक उत्तरदायित्वका कार्यलाई निरन्तरता दिने प्रतिबद्धता व्यक्त गर्नुभयो ।
राहत सामग्री ग्रहण गर्दै रेडक्रस जिल्ला शाखाका सभापति अग्रहरीले सहकारी मार्फत पहिलो पटक राहत सामग्री प्राप्त भएको भन्दै धन्यवाद ज्ञापन गर्नुभयो । केहि दिन अघि आएको बाढीका कारण सरावल गाउँपालिकाको वडा नं.६ र ७ अहिले पनि डुबानबाट प्रभावित रहेको बताउँदै अध्यक्ष अग्रहरीले सही समयमा प्राप्त राहत सामग्री प्रभावितलाई हस्तान्तरण गर्ने बताउनुभयो । विपद् प्रभावितलाई उचित राहत सहयोग गर्न रेडक्रसले मात्र नसक्ने भएकोले सहयोगी हातहरुको साथ आवश्यक रहेको उहाँले उल्लेख गर्नुभयो ।
उक्त अवसरमा नेपाल रेडक्रस सोसाईटीका जिल्ला सदस्य एवं विपद् व्यवस्थापन संयोजक अर्जुन बहादुर क्षेत्री र रेडक्रस जिल्ला शाखाका वरिष्ठ अधिकृत मुरारी गुप्ताले रेडक्रस मार्फत विपद् प्रभावितलाई भईरहेको सहयोगका बारेमा प्रकाश पार्नुभएको थियो । निजामति कर्मचारी सदस्य रहेको राष्ट्रसेवक बचत तथा ऋण सहकारी संस्था २०५९ सालमा स्थापना भएको थियो । सहकारीले हाल रु ५ करोड निक्षेप पुँजी संकलन गर्न सफल रहेको संस्थाका व्यवस्थापक चिन्तामणि भट्टराईले बताउनुभयो ।