पृथ्वीचन्द्र अस्पताललाई आधुनिक स्वास्थ्य उपकरण उपलब्ध गराउन स्वास्थ्य मन्त्री पौडेलसँग माग

दैनिक 24 खबर

२०८१ आश्विन १३, आईतबार प्रकाशित (१ महिना अघि) ३८७ पाठक संख्या

मोहन पौडेल
परासी, १३ असोज । नेपाल सरकारका स्वास्थ्य तथा जनसंख्या मन्त्री प्रदीप पौडेलले पश्चिम नवलपरासीको सदरमुकाम परासीस्थित पृथ्वीचन्द्र अस्पताल र डा.विनोद निता कँडेल आँखा अस्पतालको निरीक्षण गर्नुभएको छ । नवलपरासीकै बर्दघाटमा निर्माण हुन लागेको उपत्यका बाहिरको पहिलो ट्रमा सेन्टरको शिलान्यास गर्न आईतबार नवलपरासी आउनुभएका मन्त्री पौडेलले लुम्बिनी प्रदेशका स्वास्थ्यमन्त्री खेम सारुसहित पृथ्वीचन्द्र अस्पतालको निरीक्षण गर्नुभएको हो ।
मन्त्री पौडेललाई अस्पतालका अध्यक्ष महेन्द्र गुप्ता, चिकित्सक तथा स्वास्थ्यकर्मीहरुले स्वागत गर्नुभएको थियो । उक्त अवसरमा अस्पतालको तर्फबाट निमित्त मेडिकल सुपरिटेन्डेट डा. मोहम्मद नुरुल होदाले अस्पतालका लागि अत्याधुनिक स्वास्थ्य उपकरण उपलब्ध गराउन माग गर्नुभयो । जनशक्ति भएपनि उपकरणको अभावमा सेवा प्रवाह गर्न कठिनाई भएको बताउँदै डा. होदाले अर्थोपेडिक (हाडजोर्नी)को शल्यक्रियाका लागि आवश्यक पर्ने सी–आम मेसिन,पित्त थैली लगायतको शल्यक्रियाका लागि ल्याप्रोस्कोपिक मेसिन, जनरल एनेस्थेसिया (बेहोस गराउने ) मेसिन र कानको शल्यक्रिया गर्ने मेसिन उपलब्ध गराउन माग गरिएको जानकारी दिनुभयो ।
पृथ्वीचन्द्र अस्पतालमा यी मध्ये हाल अर्थोपेडिकको शल्यक्रियाका लागि प्रयोगमा रहेको पूरानो एक थान मेसिन र एक थान जिओ मेसिन रहेको छ । अस्पतालको नवनिर्मित भवनबाट सेवा प्रवाह शुरु भएपछि आकस्मिक र अतिरिक्त सेवाका लागि छुट्टाछुट्टै उपकरण आवश्यक हुने भएकोले सरकारसँग थप उपकरण माग गरिएको डा.होदाले बताउनुभयो । चार वटै उपकरणका लागि आवश्यक जनशक्ति र विशेषज्ञ चिकित्सक सेवा भने अस्पतालमा उपलब्ध रहेको उहाँले बताउनुभयो । पृथ्वीचन्द्र अस्पताल लुम्बिनी प्रदेश सरकार मातहत रहेको ५० शैय्याको अस्पताल हो ।
यस्तै स्वास्थ्य मन्त्री पौडेलले आईतबार नै परासीस्थित डा.विनोद निता कँडेल आँखा अस्पतालको पनि निरीक्षण गर्दै त्यहाँको सेवा प्रवाहको विषयमा जानकारी लिनुभएको छ । मन्त्री पौडेलसहितको टोलीलाई पूर्वगृहराज्यमन्त्री एवं नेपाल नेत्र ज्योति संघ नवलपरासीका अध्यक्ष देवेन्द्रराज कँडेल र आँखा अस्पताल व्यवस्थापन समितिकी अध्यक्ष मञ्जु कँडेल लगायतले स्वागत गर्नुभएको थियो ।