यातायात सञ्चालनमा रोक लगाएर दाउन्ने सडकखण्ड बिस्तार गरिने

दैनिक 24 खबर

२०८१ चैत्र २२, शनिबार प्रकाशित (२३ घण्टा अघि) २९७ पाठक संख्या

मोहन पौडेल
परासी, २३ चैत । पूर्वपश्चिम राजमार्ग अन्र्तगत बुटवल–नारायणगढ सडक खण्ड अन्र्तगत दाउन्ने क्षेत्रमा यातायात रोकेर सडक विस्तार गरिने भएको छ ।
यही चैत २७ गतेदेखि ३१ गतेसम्म दिउँसो ४ घण्टा र २०८२ वैशाख १ देखि १५ गतेसम्म रातको समयमा ६ घण्टा यातायात रोकेर सडक विस्तारको कार्यलाई अघि बढाउन लागिएको हो । पश्चिम नवलपरासी र पूर्वी नवलपरासीका सरोकारवालाहरुको आज दाउन्नेमा बसेको संयुक्त बैठकले यातायात रोकेर भएपनि दाउन्ने क्षेत्रको सडक विस्तारलाई तीव्रता दिने निर्णय गरेको जिल्ला समन्वय समिति पश्चिम नवलपरासीका प्रमुख भगौती यादव(रुदल)ले जानकारी दिनुभयो ।
उहाँका अनुसार चैत २७ देखि ३१ गतेसम्म विहान ११ बजेदेखि दिउँसो ३ बजेसम्म सवारी आवागमन बन्द गरिने छ भने आगामी वैशाख १ देखि पन्ध्र गतेसम्म राति ११ बजेदेखि विहान ५ बजेसम्म अत्यावश्यक बाहेकका सवारी साधन सञ्चालनमा रोक लगाइने छ ।
“यो खण्डमा तत्काल मर्मत कार्यलाई तीव्रता दिन नसके सवारी आवातजावतमा कठिनाइ मात्र नभई दुर्घटना निम्तने खतरा बढेको छ,सम्भावित विपत्तीको खतरालाई न्यूनीकरण गर्न सडक मर्मत र विस्तारको काम यथाशीघ्र गर्नुपर्ने देखियो,त्यसैले यातायातमा रोक लगाएर सडक विस्तार कार्य गर्न सम्बन्धित निकायमा सिफारिस गर्ने निर्णय गरेका हौँ”, जिसस प्रमुख यादवले भन्नुभयो ।

हाल भइरहेको सडक विस्तारका कारण दाउन्नेमा घण्टौँ जाम हुँदा आवातजावत कष्टकर बन्दै आएको छ । बर्दघाटदेखि दुम्किबाससम्मको १३ किलोमिटर दुरी पार गर्न झण्डै ५÷६ घण्टा लाग्ने गरेको यात्रुहरुको गुनासो छ । यस्तै बैठकले उक्त सडक खण्डमा सवारी साधन व्रिगेर सडक अवरुद्ध हुन पुगेमा तत्काल उक्त सवारी साधन हटाइ सडक सुचारु गर्न उपकरण र जनशक्तिसहितको टीम २४ घण्टा तैनाव अवस्थामा राख्ने व्यवस्था मिलाउन आयोजनालाई निर्देशन गरेको छ ।