स्रोत नखुलेको १२ लाख रुपैयाँसहित दुई युवा परासीबाट पक्राउ

दैनिक 24 खबर

२०८१ चैत्र ५, बुधबार प्रकाशित (२ हफ्ता अघि) ४९१ पाठक संख्या

मोहन पौडेल
परासी, ६ चैत । हुण्डी कारोबारको आशंकामा पश्चिम नवलपरासी प्रहरीले नेपाली १२ लाख रुपैयाँ नगदसहित दुई जनालाई पक्राउ गरेको छ ।
पक्राउ पर्नेमा पश्चिम नवलपरासीको पाल्हीनन्दन गाउँपालिका–२ भक्सिपुरका २२ वर्षीय सुख सागर यादव र प्रतापपुर गाउँपालिका–८ पिपरपातीका ३९ वर्षीय शिवेन्द्र प्रसाद बनिया रहेका छन् ।
बरामद रकमको स्रोत खुल्न नसकेकोले उनीहरु माथी अवैद्य वित्तीय कारोबार(हुण्डी)को आशंका गरिएको जिल्ला प्रहरी कार्यालय नवलपरासीका सूचना अधिकारी प्रहरी निरीक्षक नारायण थापाले जानकारी दिनुभयो ।

पक्राउ परेका दुवै जनाबाट प्रहरीले छुट्टाछुट्टै ६÷६ लाख रुपैयाँ नगद र उनीहरुले प्रयोग गरेका दुई वटा भारतीय नम्बर प्लेटका मोटरसाईकल बरामद गरेको छ ।
भारतबाट नेपालतर्फ हुण्डी कारोबार भईरहेको भन्ने विशेष सूचनाको आधारमा जिल्ला प्रहरी कार्यालयबाट खटिएको प्रहरीले टोलीले सदरमुकाम परासीस्थित रामग्राम–५ वाईपास चोकबाट उनीहरुलाई नियन्त्रणमा लिएको थियो ।
पक्राउ परेका दुवैजना विरुद्ध नवलपरासी जिल्ला अदालतबाट म्याद थप गरि हुण्डी कारोबार सम्बन्धी कसुरमा अनुसन्धान भईरहेको प्रहरीले जनाएको छ ।