मदारबाबा मेला व्यवस्थापन गर्न दुई जिल्लाको संयुक्त समिति गठन,तयारी तीव्र

दैनिक 24 खबर

२०७९ माघ २१, शनिबार प्रकाशित (१ साल अघि) ७१५ पाठक संख्या

नवलपरासी, २१ माघ । मुस्लिम र हिन्दु धर्मावलम्बीहरुको पवित्र धार्मिक स्थल मदारबाबा मेलाको तयारी तीव्र पारिएको छ । प्रत्येक वर्ष लाखौँै भक्तजनको उपस्थितिमा लाग्दै आएको मेला व्यवस्थापन गर्न यस वर्ष नवलपरासी पश्चिम र पूर्व दुवैतर्फको संयुक्त व्यवस्थापन समिति गठन गरेर तयारी तीव्र पारिएको हो ।
विनयी त्रिवेणी गाउँपालिका वडा नं. ६ मा भएको दुवै जिल्लाको संयुक्त भेलाले लाल महम्मद अन्सारीको नेतृत्वमा मूल व्यवस्थापन समिति गठन गरेर मेलाको तयारीलाई तीव्रता दिएको समितिका सचिव मनि कुमार श्रेष्ठले जानकारी दिनुभयो । विनयी त्रिवेणी ६ का वडा अध्यक्ष नुरेन्द्र शाह, वडा नं. ७ का वडा अध्यक्ष उमेश कार्की, सुस्ता २ का वडा अध्यक्ष कृष्णलाल मुखिया तथा सुरक्षा निकायका प्रमुखहरुसहितको उपस्थितिमा भएको सयुक्त भेलाले मूल समिति गठन गरेको हो ।
समितिको उपाध्यक्षमा मोहम्मद रफी, सचिवमा मनि कुमार श्रेष्ठ, कोषाध्यक्षमा रियाजुलक अन्सारी,सहसचिवमा अजमुद्धिन मिया लगायत रहनुभएको छ । समितिले माघ २७ देखि फागुन ६ गतेसम्म यस वर्षको मेला सञ्चालन गर्ने निर्णय गरेको छ । यसैगरी मेलामा सुस्ता २ महलबारी मस्जिदका मठाधिस अमिरुल्लाह अन्सारी नै परम्परादेखि मदारीडाँडाको गद्दीमा आसिन हुने परम्परालाई यसवर्ष पनि निरन्तरता दिने समितिले निर्णय गरेको छ ।
महाशिवरात्रीसम्म सञ्चालन हुने उक्त मेलामा नेपाल र भारतका गरी लाखौँ दर्शनार्थीहरुको घुँईचो लाग्ने गर्दछ । मदारबाबा स्थान मुस्लिम समुदायको नेपालकै ठूलो र ऐतिहासिक स्थल हो । विशेषगरी मुस्लिम समुदायको धार्मिक स्थल भएपनि त्यहाँ हिन्दु, बौद्ध धर्मावलम्बीको पनि आगमन हुने गरेको छ । यो स्थानको प्रवेशद्धार पश्चिम नवलपरासीको सुस्ता गाउँपालिका–२ महलबारीमा र मुख्य समाधिस्थल भने महलबारीबाट उत्तर नौ किलोमिटर विनयी त्रिवेणीको मदारीडाँडामा रहेको दुई जिल्लावासीको दाबी छ । मदारीडाँडामा पैदलयात्रा मार्फत पुग्न सकिन्छ ।
जिल्ला सदरमुकाम परासीबाट २७ किलोमिटर पुर्व तथा पुर्वपश्चिम राजमार्गको बर्दघाटदेखि २१ किलोमिटर पूर्वमा रहेको मदारथानमा हिन्दुहरुको पर्व शिवरात्री शुरु हुनुभन्दा एक हप्ता अघि देखि ठूलो मेला लाग्ने गर्दछ ।
मदारबाबाले थुप्रै मुलुकसहित नेपालको नवलपरासी र बुटवलस्थित फुलबारीपार्क क्षेत्रमा समेत तपस्या गरेको इतिहास पाइन्छ । यहाँ भाकल गर्नाले सन्तान नहुनेले सन्तान प्राप्त गर्छन् भन्ने जनविश्वास समेत रहेको छ । मदारथान(मदारबाबाको समाधिस्थल) पुग्न सुस्ता–२ महलवारीबाट करिब ३ देखि ४ घन्टाको पहाड चढेर जानुपर्दछ । मदारबाबाको पूरा नाम हजरत बदिउदिन कुतुबुल मदार शाह रहमतुल्ला अलैहे हो । मदारबाबाले उक्त स्थानमा दुई पटकसम्म ४०÷४० दिन तपस्या गर्नु भएको थियो । त्यहाँ पुग्ने दर्शनार्थीहरू रातभर जाग्राम बस्ने गर्छन् ।