रामग्रामका दुई हजार ४६८ किशोरीलाई एचपीभी खोप लगाइँदै, नगर प्रमुख यादवद्धारा शुभारम्भ

दैनिक 24 खबर

२०८१ माघ २२, मंगलबार प्रकाशित (१0 महिना अघि) ३१६ पाठक संख्या

मोहन पौडेल
परासी, २२ माघ । पश्चिम नवलपरासीको रामग्राम नगरपालिकामा एचपीभी खोप अभियान शुरु भएको छ । परासीको आदर्श माविबाट शुरु भएको यो अभियानको नगर प्रमुख धनपत यादवले शुभारम्भ गर्नुभएको हो ।
नगर प्रमुख यादवले अभियानलाई प्रभावकारी बनाउन आग्रह गर्दै अभियानलाई पूर्ण सफल बनाउन निर्देशन दिनुभयो । स्वास्थ्य कार्यालयका प्रमुख गौरव ढकालले खोप सुरक्षित र प्रभावकारी रहेकोले ढुक्क भएर लगाउन आग्रह गर्नुभयो । विद्यालय व्यवस्थापन समितिका अध्यक्ष लक्ष्मण यादवको अध्यक्षतामा उक्त कार्यक्रम भएको थियो ।
आजदेखि शुरु भएको अभियान अन्र्तगत नगर भित्रका दुई हजार ४६८ जना किशोरीहरुलाई एचपीभी खोप लगाईने नगरपालिकाका स्वास्थ्य शाखाका जनस्वास्थ्य निरीक्षक सुरज हरिजनले जानकारी दिनुभयो । त्यसमध्ये कक्षा ६ देखि १० सम्म अध्ययनरत दुई हजार ४२३ जना र विद्यालय बाहिरका १० देखि १४ वर्ष उमेर समूहका ४५ जना रहेका छन् ।
सामुदायिक तथा निजी गरी ३९ विद्यालयमा ३५ वटा खोप केन्द्र निर्धारण गरि अभियान शुरु गरिएको उहाँले बताउनुभयो । नगर भित्रका १५ वटा स्वास्थ्य संस्था मार्फत सञ्चालन गरिएको खोप अभियानमा खोप स्वास्थ्य कार्यकर्ता ३५ जना तथा ५१ जना स्वयमसेवक खटाइएको छ ।
अभियान शुभारम्भ अघि आजै विहान पालिका स्तरीय खोप समन्वय समितिका पदाधिकारीहरुलाई अभियानको विषयमा अभिमुखीकरण गरी अभियान सफल बनाउन निर्देशन गरिएको रामग्राम नगरपालिकाका प्रमुख प्रशासकीय अधिकृत यमबहादुर कुँवरले बताउनुभयो ।