प्रसाद खाँदा एकै गाउँका १२५ बिरामी,नगरपालिकाद्धारा गाउँमै शिविर सञ्चालन गरी स्वास्थ्य परीक्षण

दैनिक 24 खबर

२०७९ आश्विन २६, बुधबार प्रकाशित (४ साल अघि) ९७९ पाठक संख्या

मोहन पौडेल
परासी, २६ असोज । पश्चिम नवलपरासीमा दुर्गा पूजा समापनपछि प्रसाद खाएका एकै गाउँका सय बढी गाउँले बिरामी परेका छन् । बिरामी मध्ये चार जनाको अवस्था गम्भीर रहेको छ । उनीहरुलाई प्रारम्भीक स्वास्थ्य परीक्षणपछि अस्पताल भर्ना गरिएको छ ।
रामग्राम नगरपालिका वडा नं. १८ स्थित पम्फापुरमा दुर्गा पूजाको समापन पछि प्रसाद खाएका गाउँका सबैजसो बिरामी परेको बताईएको छ । स्थानीय पन्ध्र घरपरिवारका एक सय भन्दा बढीले प्रसाद खाएपछि वान्ता आउने, पखला लाग्ने ज्वरो आउने समस्या देखिएको रामग्राम नगरपालिकाका प्रमुख धनपत यादवले दैनिक24खवरलाई जानकारी दिनुभयो ।
ऋाज गाउँमा महामारीको अवस्था फैलिएको सूचना पाएलगत्तै मेयर यादवले स्वास्थ्यकर्मीको टोली लगेर सबै बिरामीको स्वास्थ्य परीक्षण तथा औषधी वितरण गरिएको बताउनुभयो । उहाँका अनुसार बिरामी मध्ये चार जनाको अवस्था गम्भीर देखिएपछि एम्बुलेन्स मार्फत पृथ्वीचन्द्र अस्पतालमा ल्याई भर्ना गरिएको छ । मेयर यादव, उपमेयर सम्झना चौधरी,स्थानीय जनप्रतिनिधि र स्वास्थ्यकर्मीको टोली आज उक्त गाउँमा पुगेको थियो ।
स्वास्थ्यकर्मीको टोलीले आकस्मिक स्वास्थ्य शिविर सञ्चालन गरी १२५ जनाको स्वास्थ्य परीक्षण गरी औषधी वितरण गरेको स्वास्थ्य शाखाका स्वास्थ्य सहायक सुरज गौतमले जानकारी दिनुभयो । सिकिस्त बिरामीलाई अस्पताल रिफर गरी समुदायमा महामारी फैलिन नदिन स्थानीयवासीलाई आवश्यक सचेतना प्रदान गरिएको छ भने प्रसाद खाएर बिरामी परेका अन्यको स्वास्थ्यमा सुधार नआएसम्म स्थानीय अमरवन स्वास्थ्य चौकीमार्फत उपचार हुने गरी परिचालन गरिएको उहाँले बताउनुभयो । आईतबार  प्रसादको रुपमा पुरी तरकारी खिर खाएपछि सोही रातिदेखि सबै गाउँले बिरामी परेको स्थानीयले बताएका छन् ।