अरनिको स्मृति दिवस : नवलपरासीमा कलाकार अभिमुखीकरण र वनभोज

दैनिक 24 खबर

२०८१ पौष २४, बुधबार प्रकाशित (१ दिन अघि) १०२ पाठक संख्या

परासी, २४ पुस । नेपाल कमर्शियल आर्टिष्ट संघ नवलपरासीले अरनिको स्मृति दिवसको अवसरमा मंगलबार सुनवल हिलपार्कमा अभिमुखीकरण तथा वनभोज कार्यक्रम गरेको छ।
संघका अध्यक्ष राजकुमार रेश्मीको अध्यक्षतामा सम्पन्न कार्यक्रममा २२ जना कलाकारको सहभागिता रहेको थियो। कार्यक्रमको सुरुवातमा नेपाली कला र संस्कृतिका प्रतीक कलाकार अरनिकोको तस्वीरमा माल्यार्पण गर्दै उहाँको योगदानको स्मरण गरिएको थियो।
अध्यक्ष रेश्मीले कलाको महत्वलाई नयाँ उचाइमा पुर्‍याउन र यसलाई व्यवसायिक दृष्टिकोणबाट रुपान्तरण गर्न अभिमुखीकरण गरिएको बताउनुभयो। उहाँले नवलपरासीमा छरिएर रहेका तर संघमा आवद्ध नभएका कलाकारलाई खोजी गरी संगठनमा समेट्ने योजना पनि सार्वजनिक गर्नुभयो।
“कलाकारहरूको एकता र सशक्तिकरणले मात्र कला व्यवसायलाई थप सवल बनाउन सकिन्छ र कलाकारको हकहितको संरक्षण सम्भव हुन्छ,” अध्यक्ष रेश्मीले भन्नुभयो।
कार्यक्रममा बोल्दै संघका उपाध्यक्ष दशरथ कुमालले कलाकारिताले समाजमा सकारात्मक परिवर्तन ल्याउने शक्ति राख्ने भन्दै स्थानीय कलाकारप्रति दृष्टिकोण सुधार्न आवश्यक रहेको औंल्याउनुभयो।
“सकारात्मक सोचले कलाकारको प्रतिभा उजागर हुन्छ र कलात्मक सृजनामा नयाँ सन्दर्भ थपिन्छ,” उपाध्यक्ष कुमालले भन्नुभयो।
अहिले सौन्दर्यकरणका लागि मुराल पेन्टिङ र भित्ते चित्रहरूको चलन बढिरहेको भन्दै स्थानीय तहले यसलाई प्राथमिकतामा राख्नुपर्नेमा कार्यक्रममा जोड दिइयो। ऐतिहासिक, धार्मिक, र सांस्कृतिक सम्पदाको प्रवर्द्धनमा यस्ता कलात्मक अभ्यासहरूले महत्त्वपूर्ण योगदान पुर्‍याउने सहभागीहरूले बताउनुभयो।
सचिव धर्मेन्द्र चौधरी, सदस्य दीपक चौधरी र कलाकार चमबहादुर थापालगायतले यस्ता कार्यक्रमले कलाकारलाई प्रोत्साहन गर्ने र उनीहरूको क्षमता विस्तार गर्न सहयोग गर्ने धारणा राख्नुभयो अरनिको स्मृति दिवस देशभर विविध कार्यक्रमहरूका साथ मनाइएको छ। रुपन्देहीको भैरहवामा लाइभ आर्ट प्रदर्शन गरिएको छ भने बुटवलले हिलपार्कमा वनभोज कार्यक्रम आयोजना गरेको छ।
यसरी, स्मृति दिवसले नेपाली कलाकारितालाई प्रेरित गर्दै सृजनात्मक प्रयासहरूलाई नयाँ दिशा दिएको छ।
नवलपरासीमा आयोजित यो कार्यक्रमले कलाकारहरूको एकता र उनीहरूको सृजनशीलतालाई सशक्त बनाउने मात्र नभई, कला व्यवसायलाई व्यावसायिक र सांस्कृतिक उचाइमा पुर्‍याउने दिशामा महत्वपूर्ण योगदान गरेको छ।