छैठौँ रामग्राम कप फुटवल प्रतियोगिता शुरु, उद्घाटन खेलमा गैँडाखाल पराजित

दैनिक 24 खबर

२०८१ आश्विन १४, सोमबार प्रकाशित (१0 महिना अघि) ४४२ पाठक संख्या

मोहन पौडेल
परासी, १४ असोज । पश्चिम नवलपरासीको रामग्राम–१२ पचगावामा छैठौँ रामग्राम कप फुटवल प्रतियोगिता २०८१ शुरु भएको छ । विजयादशमी, दिपावली तथा छठ पर्वको अवसरमा आयोजित प्रतियोगिता अन्र्तगत सोमबार सम्पन्न पहिलो खेलमा हात्ती अमहवा रुपन्देहीले विजय शुरुवात गरेको छ ।
साझा युवा क्लब रामग्राम–१२ को आयोजनामा शुरु भएको उक्त प्रतियोगिता अन्तरगत पहिलो खेलमा हात्ती अमहवाले गैँडाखाल नवलपरासीको टीमलाई शुन्यका विरुद्ध एक गोल गर्दै विजय शुरुवात गरेको थियो । निर्धारित समय सकिनु भन्दा एक मिनेट बाँकी छँदा पेनाल्टीको अवसरलाई सदुपयोग गर्दै हात्ती अमहवाका जर्सी नं.८ का खेलाडि अजय पासीले गोल गर्न सफल भएका हुन् । निकै प्रतिस्पर्धात्मक रहेको उक्त खेलको म्यान अफ त म्याच विजेता टीमकै जर्सी नं.३ का खेलाडि नितिनराज भण्डारी घोषित भए ।
प्रतियोगिता अन्तरगत मंगलबार सुनवल एफसी र महालक्ष्मी हार्डवेयर तुल्सीनगर भगडाबीच दिउँसो ३ बजेदेखि प्रतिस्पर्धा हुने साझा युवा क्लवका अध्यक्ष देवनारायण लोनियाले जानकारी दिनुभयो । कूल १८ टीम सहभागि रहेको उक्त प्रतियोगितामा बुधबारदेखि प्रत्येक दिन दुई वटा खेल हुनेछन् । आगामी असोज २५ गते सम्म समापन हुने लक्ष्य लिईएको उक्त प्रतियोगितामा विजेता टीमले नगद रु ५० हजार १०५ र उपविजेता टीमले नगद रु २५ हजार १०५ रुपैयाँसहित मेडल,प्रमाणपत्र र ट्रफी प्राप्त गर्ने क्लबका अध्यक्ष लोनियाले जानकारी दिनुभयो । प्रतियोगिताको एक समारोहकाबीच रामग्राम नगरपालिकाका मेयर धनपत यादवले उद्घाटन गर्नुभएको थियो ।