ईस्लामी संघ नेपालद्धारा मदिरा तथा लागूऔषध विरुद्ध सप्ताहव्यापी अभियान शुरु

दैनिक 24 खबर

२०८१ अषाढ १२, मंगलबार प्रकाशित (१0 महिना अघि) ४०२ पाठक संख्या

मोहन पौडेल
परासी,११ असार । इस्लामी संघ नेपालले मदिरा तथा लागूऔषध विरुद्धको राष्ट्रव्यापी सप्ताह अभियान शुरु गरेको छ । मुलुकमा बढ्दो मदिरा तथा लागूऔषध प्रयोग र यसले निम्त्याएका असरलाई न्यूनीकरणका लागि राष्ट्रव्यापी जनचेतना जगाउन सप्ताह व्यापी अभियान शुरु गरिएको संघले जनाएको छ ।
असार ११ अर्थात आजबाट शुरु भएको यो अभियान नवलपरासीसहित देशैभर आगामी असार १६ गतेसम्म सञ्चालन हुने ईस्लामी संघ नेपाल नवलपरासीका ईन्चार्ज मुख्तार अहमत सेराजीले दैनिक ट्वान्टीफोर खबरलाई जानकारी दिनुभयो । नशालु तथा लागूऔषधको सेवन नेपालमा प्रतिबन्धित हुनुका साथै अपराधजन्य कार्य रहेको र यसले थप अपराधका घटनाहरु पनि जन्माउने भएकोले यसको निर्मूल गर्न आवश्यक रहेको उहाँले बताउनुभयो ।
ईस्लामी संघले देशभर जनचेतना जगाउँदै मदिरा तथा लागूऔषधको प्रयोगलाई निरत्साहित गर्न आग्रह गरेको छ । लागूऔषधको नियन्त्रण गरि वर्तमान र भविष्यका कर्णधार युवाको जीवनलाई जोगाउनुपर्ने संघको धारणा छ । ६ बुँदे सन्देश प्रवाह गर्दै संघले लागूऔषध र मदिराजन्य पदार्थको प्रयोगले समग्र समाज र राष्ट्र नै आक्रान्त बनेको उल्लेख गरेको छ ।
लागूऔषधको दुव्र्यसनीबाट युवापुस्तालाई बचाउन सके समाजमा हुने विकृति, विसंगती नियन्त्रण हुनुका साथै विभिन्न अपराधका घटना पनि न्यूनीकरण गर्न सकिने संघका जिल्ला ईन्चार्ज सेराजीले बताउनुभयो । ईस्लामी संघले मादक तथा लागूपदार्थको उत्पादन, व्यापार, आयात निर्यात र प्रयोगमा कडा प्रतिबन्ध लगाउन सरकारसँग माग गरेको छ । यस्ता कार्यमा संलग्नलाई कडा कारवाही गर्न पनि संघले सरकारको ध्यानाकर्षण गराएको छ । यस अभियानलाई आआफ्नो ठाउँबाट सहयोग गरि लागूऔषध मुक्त समाज बनाउने अभियानमा जिम्मेवारी भूमिका निर्वाह गर्न आम नागरिकमा संघले आह्वान गरेको छ भने यस किसिमका वस्तुहरुको प्रचारप्रसारमा स्थान नदिन मिडियाहरुलाई पनि आग्रह गरिएको ईस्लामी संघ नेपालका अध्यक्ष एवं अभियानका संयोजक सेराज अहमत मुस्लिमले बताउनुभयो ।