आधुनिक शिक्षण विधि सिकाउन पूर्व प्राथमिक तहका शिक्षकहरुलाई तालिम दिँदै जीसन नवलपरासी

दैनिक 24 खबर

२०८० जेष्ठ ३१, बुधबार प्रकाशित (३ साल अघि) १९२३ पाठक संख्या

मोहन पौडेल
परासी, ३१ जेठ । पश्चिम नवलपरासीको परासी क्षेत्रका निजी विद्यालयमा अध्यापनरत पूर्व प्राथमिक तहका शिक्षकहरुका लागि तालिम सञ्चालन गरिएको छ । संस्थागत विद्यालयहरको संगठन जीसन नवलपरासीले आफ्ना सदस्य विद्यालयका पूर्व प्रावि तहका शिक्षकहरुलाई तालिम दिएको हो ।
परासीमा आजदेखि शुरु भएको उक्त दुई दिने तालिमको उद्घाटन गर्दै जिल्ला समन्वय समितिका प्रमुख भगौती यादव (रुदल)ले शिक्षकले दिने सही शिक्षा र सिकाइ विधिले बालबालिकाको भविष्य निर्धारण हुने बताउनुभयो । उहाँले बालबालिकाको मनोविज्ञान बुझेर शिक्षण गर्नका लागि यस्ता तालिमहरु उपलब्धिमूलक हुने बताउँदै तालिममा सिकेको कुरा बालकेन्द्रीत विधिबाट शिक्षण सिकाई क्रियाकलाप गर्न आग्रह गर्नुभयो ।
जिसस प्रमुख यादवले शैक्षिक विकासमा निजी विद्यालयको महत्पूर्ण योगदान रहेको बताउँदै राज्यले आवश्यक सहयोग गर्नुपर्नेमा जोड दिनुभयो ।
जीसन नवलपरासीका अध्यक्ष डम्बर गुरुङले शिक्षा विधिमा एकरुपता ल्याई बालबालिकाको बहुआयामिक विकासका लागि पूर्व प्राथमिक तहका शिक्षकहरुलाई नयाँ र आधुनिक शिक्षण विधि थाहा हुन जरुरी रहेकोले तालिमको आयोजना गरिएको बताउनुभयो । बालबालिकाले पूर्वप्राथमिक तहमा सिकेको ज्ञानले जीवनलाई सहि बाटो तिर लाग्न प्रेरित गर्ने उहाँको जोड थियोे ।
जीसनका सहसचिव एवं तालिम संयोजक बलिराम यादवले पूर्वप्राथमिक तहका सिकेको कुराले जीवनमा प्रभाव पर्ने भएकाले बालबालिकाहरुलाई असल नागरिक बनाउनका लागि शिक्षकलाई तालिम दिईएको बताउनुभयो । कक्षा व्यवस्थापन कसरी गर्ने, शिक्षण विधि कुन अपनाउने, बालबालिकाहरुलाई कसरी शिक्षणतर्फ केन्द्रीत गर्ने, परिमार्जित पाठ्यक्रम अनुसारको शिक्षण कार्य विधि जस्ता कुराहरु तालिममा सिकाइने उहाँले बताउनुभयो । शिक्षकहरुको पढाउने कलाको विकास गर्न र गुणस्तरीय शिक्षा प्रदान गर्न जीसनले यश किसिमका तालिमहरु सञ्चालन गर्दै आएको जीसन नवलपरासीका उपाध्यक्ष सञ्जय ढुंगानाले जानकारी दिनुभयो । तालिममा रामग्राम,सुनवल नगरपालिका तथा पाल्हीनन्दन गाउँपालिकाका जीसनमा आबद्ध २० निजी विद्यालयका १०३ जना शिक्षकहरुको सहभागिता रहेको जीसनका सचिव यज्ञप्रसाद न्यौपानेले जानकारी दिनुभयो । दीपा खनाल र प्रतीक्षा पुलामीले तालिममा सहजीकरण गर्नुभएको छ । उद्घाटन समारोहमा जीसनका प्रमुख सल्लाहकार सन्तोष रौनियार,सल्लाहकार ईन्द्र गुरुङ,यमबहादुर थापा लगायतको पनि सहभागिता रहेको थियोे ।