स्वास्थ्यमन्त्री त्रिपाठीले पठाए पिसीआर मेसिन, अब परासीमै कोरोना परीक्षण हुने

मोहन पौडेल

२०७८ बैशाख ३०, बिहिबार प्रकाशित (३ साल अघि) ९१० पाठक संख्या

परासी, ३० वैशाख। कोभिड–१९ परीक्षणका लागि स्वाब संकलन गरी अन्यत्र जिल्लामा पठाउनुपर्ने नवलपरासी ( बर्दघाट सुस्ता पश्चिम) को बाध्यता हट्ने भएको छ ।
सदरमुकाम परासीस्थित पृथ्वीचन्द्र जिल्ला अस्पतालमा पिसीआर मेसिन आएसँगै स्वाब परीक्षणलाई अन्यत्र जिल्ला पठाउनुपर्ने बाध्यता हट्न लागेको हो ।
जिल्लामा पिसीआर मेसिन नहुँदा बुटवल, भैरहवा पठाउनुपर्ने बाध्यता छ। स्वास्थ्य तथा जनसंख्यामन्त्री हृदयेश त्रिपाठीले जिल्लावासीको आवश्यकता र मागलाई मध्यनजर गर्दै जिल्ला अस्पतालमा पिसीआर मेसिन पठाउनुभएको हो । मन्त्री त्रिपाठीले गृहजिल्लामा पिसीआर मेसिन उपलब्ध गराएपछि स्वाब परीक्षणमा राहत पुग्ने भएको हो ।
मेसिन आएपनि सञ्चालनमा आउन भने केही समय लाग्ने अस्पतालका अध्यक्ष जगदीश चौधरीले दैनिक
24 खबर डटकमलाई जानकारी दिनुभयो ।
पिसीआर मेसिनको लागि आवश्यक पूर्वाधार र जनशक्तिको व्यवस्थापन गर्नुपर्ने भएकाले मेसिन सञ्चालन गरी स्वाब परीक्षण गर्न समय लाग्ने उहाँले बताउनुभयो ।
मेसिन सञ्चालनका लागि कम्तीमा तीनवटा कोठा आवश्यक पर्ने तर अस्पतालमा कोठा अभाव रहेकोले व्यवस्थापनका लागि रामग्राम नगरपालिकासँग समन्वय भईरहेको अध्यक्ष चौधरीले उल्लेख गर्नुभयो ।
मेसिन आएपनि पूर्वाधार व्यवस्थापन र परीक्षण किट लगायत अन्य आवश्यक स्वास्थ्य सामग्री पनि अभाव रहेको अस्पतालले जनाएको छ । मेसिन सञ्चालनका लागि नगरपालिकाले दुई जना प्राविधिक स्वास्थ्यकर्मीलाई प्रदेश जनस्वास्थ्य प्रयोगशालामा तालीमको लागि पठाएको नगरपालिकाले जनाएको छ ।
अहिले जिल्लामा स्वाब संकलन गरि भैरहवा पठाउनु पर्ने बाध्यता छ । त्यहाँबाट रिपोर्ट आउन तीन/ चार दिन लाग्ने गरेको स्वास्थ्य कार्यालय परासीका प्रमुख कृष्णप्रसाद पोखरेलले बताउनुभयो । जिल्लामै परीक्षण हुन सके छिटो नतिजा प्राप्त हुनुका साथै परीक्षणको दायरा पनि बढाउन सकिने उहाँले बताउनुभयो ।
पिसीआर मेसिन आएपछि जिल्लावासीले खुशी व्यक्त गर्दै छिटो सञ्चालनमा ल्याउन माग गरेका छन् ।