सुनवलको कीर्तिपुरमा प्रथम जेनीथ कप नकआउट फुटवल प्रतियोगिता हुँदै

दैनिक 24 खबर

२०८१ पौष १४, आईतबार प्रकाशित (६ दिन अघि) २८७ पाठक संख्या

मोहन पौडेल
परासी, १४ पुस । पश्चिम नवलपरासीको सुनवलमा प्रथम जेनीथ कप खुल्ला फुटवल प्रतियोगिता हुने भएको छ । सुनवल नगरपालिका–३ कीर्तिपुर खेलमैदानमा आगामी पुस १७ देखि माघ ३ गतेसम्म प्रतियोगिता सञ्चालन गर्न लागिएको हो ।
प्रतियोगिता आयोजक जेनीथ युथ क्लव कीर्तिपुरले आज पत्रकार सम्मेलन गरी प्रतियोगिताबारे जानकारी गराएको हो । प्रतियोगितामा विजयी टीमलाई नगद रु एक लाख एक हजार १११ र उपविजेता टीमलाई ५५ हजार ५५५ सहित शिल्ड मेडल र प्रमाणपत्र प्रदान आयोजक क्लबले जनाएको छ । जेनीथ युथ क्लवले सञ्चालन गर्दै आएको प्रतियोगितामा यो अहिले सम्मकै सर्वाधाकि पुरस्कार राशी हो ।
्नकआउट फुटवल प्रतियोगितामा कुल १६ टीमले सहभागिता जनाउन लागेको क्लबका अध्यक्ष निकेश गुरुङ्गले जानकारी दिनुभयो । जसमध्ये जिल्लाबाहिरका ४ टीम हुनेछन् भने अन्य जिल्ला भित्रकै स्थानीय खेलाडीले अवसर पाउने उहाँले बताउनुभयो ।
प्रतियोगितामा प्रत्येक खेलका म्यान अफ द म्याच घोषित खेलाडिलाई नगद रु एक हजार ५००,उत्कृष्ट खेलाडिलाई रु ५ हजार, उत्कृष्ट डिफेन्डर, धेरै गोल गर्ने खेलाडि, र उत्कृष्ट गोलकिपरलाई रु ४ हजारका दरले नगद पुरस्कार प्रदान गरिने क्लवका पूर्व अध्यक्ष एवं कीर्तिपुर टोल सुधार समितिका अध्यक्ष बद्रीमान श्रेष्ठले जानकारी दिनुभयो ।
कार्यक्रममा प्रमुख अतिथिको रुपमा बोल्दै जिल्ला फुटवल संघका कार्यबाहक अध्यक्ष ज्ञानु गुरुङ्गले यस प्रतियोगिताको माध्यमबाट नयाँ खेलाडीलाई अवसर प्रदान गर्दै स्थानीय स्तरबाट खेलाडी उत्पादन गर्ने र खेल क्षेत्रको विकासमा टेवा पुर्याउने विश्वास व्यक्त गर्नुभयो । प्रतियोगिता सञ्चालनका लागि सुनवल नगरपालिकासहित देशविदेशमा रहनुभएका शुभचिन्तकहरुले सहयोग गर्ने क्लवले जनाएको छ । प्रतियोगिता सञ्चालनका लागि आवश्यक तयारी पनि तीव्र रुपमा भईरहेको क्लवका सल्लाहकार बलबहादुर थापाले जानकारी दिनुभयो ।