ज्ञान केन्द्रद्धारा कृषकको घरआगँनमै पुगेर बाली उपचार शिविर सञ्चालन, ३०० कृषक लाभान्वित

दैनिक 24 खबर

२०८० पौष २५, बुधबार प्रकाशित (८ महिना अघि) ५५० पाठक संख्या

मोहन पौडेल
परासी, २५ पुस । कृषि ज्ञान केन्द्र पश्चिम नवलपरासीले कृषकको घरआँगनमै पुगेर बाली उपचार शिविर सञ्चालन गरेको छ । घर आँगनमै कृषि प्राविधिक आएर आफूले लगाएको कृषि बालीमा देखिएको समस्या र समाधानको उपाय समेत जानकारी पाएपछि स्थानीय कृषक खुशी भएका छन् ।
कृषि ज्ञान केन्द्रले तरकारी पकेट क्षेत्रको रुपमा चिनिएको रामग्राम–१७ स्थित पिपरहियामा आज बाली उपचार शिविर सञ्चालन गरेको हो । शिविरबाट स्थानीय तीन सय कृषक लाभान्वित भएको ज्ञान केन्द्रका बागवानी विकास अधिकृत समिर बराई मगरले जानकारी दिनुभयो । शिविरमा बाली विशेषज्ञ एवं कृषि ज्ञान केन्द्र रुपन्देहीका बाली संरक्षण अधिकृत राजेन्द्र यादवको नेतृत्वमा बालीको परीक्षण तथा उपचार सेवा प्रदान गरिएको थियो ।
कृषकले लगाएको तरकारी, गहुँ लगायतका बालीमा विभिन्न रोग तथा किराको प्रकोप देखिएपछि ज्ञान केन्द्रले शिविर सञ्चालन गरेको हो । परीक्षणको क्रममा स्थानीय कृषकले लगाएको काउली, टमाटर लगायतमा डडुवा रोग देखिएको अधिकृत मगरले जानकारी दिनुभयो । कृषकको बालीमा देखिएको रोग तथा किरा नियन्त्रणका लागि विषादी समेत वितरण गरिएको थियो भने बाली जोगाउने अन्य उपचार पद्धतिबारे पनि जानकारी गराईएको थियो ।

कार्यक्रममा प्रमुख अतिथिको रुपमा बोल्दै उक्त वडाका वडा अध्यक्ष कन्हैया मौर्यले आफूहरुको घर आगँनमै आएर बालीको उपचार सेवा दिएकोमा कृषि ज्ञान केन्द्रलाई धन्यवाद व्यक्त गर्नुभयो । यहाँका अधिकांश किसान तरकारी खेतीमा आवद्ध रहेकोले कृषकले भोग्नुपरेको समस्या समाधानमा यो शिविरले महत्वपूर्ण सहयोग पुग्ने उहाँको भनाई थियो ।
कृषि ज्ञान केन्द्रका प्रमुख डा.रविन्द्रनाथ चौवेले यो वर्ष तीन स्थानमा बाली उपचार शिविर सञ्चालन गर्ने गरि योजना बनाईएको बताउनुभयो । बालीमा देखिएको रोगको पहिचान गरि समयमै जोगाउने प्रयास गरेमा सम्भावित क्षति कम हुने भन्दै प्रमुख चौबेले शिविरबाट प्रर्याप्त लाभ लिन जोड दिनुभयो ।