म्याद गुज्रेका औषधीको छानविन गरी कारवाही गर्न उपभोक्ता हित संरक्षण मञ्चको माग

दैनिक 24 खबर

२०७८ अषाढ ३०, बुधबार प्रकाशित (३ साल अघि) ८२१ पाठक संख्या

परासी, ३० असार – नवलपरासी(बर्दघाट सुस्ता पश्चिम) स्थित पृथ्वीचन्द्र अस्पतालमा ठूलो मात्रामा म्याद गुज्रेका औषधी फेला परेको छ । नागरिकले निःशुल्क पाउनुपर्ने औषधी नपाईरहेका बेला अस्पतालमा भने लाखौँ मूल्ुयका औषधी म्याद गुजारेर नष्ट गर्न थालिएको भन्दै सवत्र आलोचना शुरु भएको छ ।
बिरामीले निजी औषधी पसलबाट चर्काे शुल्कमा औषधी किन्न बाध्य हुनुपर्ने तर अस्पतालले औषधी लुकाएर म्याद गुजारेको भन्दै उपभोक्ता हित संरक्षण मञ्चले छानविन गरी कारवाही गर्न माग गरेको छ । यो अस्पतालको चरम लापरवाही भएकोले तत्काल छानविन गरी आवश्यक कारवाही गर्न प्रमुख जिल्ला अधिकारीलाई लिखित ध्यानाकर्षण गराएको मञ्चका केन्द्रिय सदस्य रामजी ज्ञवालीले जानकारी दिनुभयो ।
सरकारले निःशुल्क उपलब्ध गराउने भनेर पठाएको लाखौँ मूल्यको औषधी अस्पतालको पूरानो भवनमा लुकाएर राखिएको अवस्थामा भेटिएको उहाँले बताउनुभयो । यस सम्बन्धमा तत्काल छानविन गरी औषधीको म्याद गुज्रिनुको कारण र त्यसमा संलग्न दोषीलाई कारवाही गर्न मञ्चकी जिल्ला सहसंयोजक सम्झना चौधरीले माग गर्नुभयो ।
कोलस्ट्रोल नियन्त्रण गर्ने महङ्गो औषधीको दर्जनौ कार्टुन सहित विभिन्न प्रकारका औषधी फालिएको छ । केन्द्रिय सदस्य ज्ञवालीले आफुले नै यो औषधी बाहिरबाट किनेर खानु परेको तर अस्पतालमा यसरी फालिएको देख्दा दुःख लागेको बताउनुभयो । अस्पतालमा कार्यरत अधिकांश चिकित्सक तथा स्वास्थ्यकर्मीको आफ्नै निजी मेडिकल रहेकोले मिलेमत्तोमा अस्पतालमा आएका औषधीको म्याद गुजारेको सेवाग्राहीको आशङ्का छ ।
प्रमुख जिल्ला अधिकारी धर्मेन्द्र कुमार मिश्रले यस विषयमा छानविनका लागि सहायक प्रमुख जिल्ला अधिकारी जोरासिंह माझिको नेतृत्वमा छानविन समिति गठन गरी प्रतिवेदन पेश गर्न निर्देशन दिनुभएको छ ।