शुल्क नतिरेको बाहनामा सरकारी बिद्यालयद्वारा बिद्यार्थीलाई परिक्षाबाट बञ्चित

दैनिक 24 खबर

२०८२ पौष २, बुधबार प्रकाशित (१५ घण्टा अघि) १४४ पाठक संख्या

नवलपरासी,२ पुस । नवलपरासीको बर्दघाट–४ दिब्यनगरमा रहेको नवदिब्य ज्योति आधारभुत बिद्यालयले शैक्षिक शुल्क नतिरेको बहानामा बिद्यार्थीहरुलाई परिक्षाबाट बञ्चित गरेको छ ।
पूर्व प्राथमिक तह देखि कक्षा ६ सम्म कक्षा संचालन गरिरहेको बिद्यालयले बुधवार शैक्षिक शुल्क नतिरेको भन्दै करिब २५ जना बिद्यार्थीलाई दोस्रो त्रैमासिक परिक्षाबाट बञ्चित गरेको हो ।
परिक्षा दिनका लागि बिद्यालय पुगेका बालबालिकालाई बिद्यालय ब्यवस्थापन समितिका पदाधिकारी र शिक्षकहरुले परिक्षाको प्रबेश पत्र नदिएर बाहिरै राखेपछि बिद्यार्थीहरुमा रुवावासी मच्चिएको थियो । बिपन्न परिवारका बालबालिका अध्ययन गर्ने यस बिद्यालयमा करिब १ सय १० बढी बिद्यार्थी पढ्दै आएका छन् ।
सरकारी बिद्यालयले प्रबेश पत्र नदिई बालबालिकालाई परिक्षाबाट बञ्चित गरेपछि बाल अधिकार हनन् भएको भन्दै अभिभावकहरुले प्रतिवाद गरेका थिए ।
बाल मैत्री नगरपालिका बनाउन बर्दघाट नगरपालिकाले धमाधम कार्यक्रम गरेका बेला पालिकाको केन्द्र रहेकै वडाको बिद्यालयको यो घटना बाहिरिएको हो । बिद्यालयकी अभिभावक सीता सोतीले आफूले दुई बजे भित्र शुल्क ल्याएर दिन्छु भनेर बिद्यालयमा आग्रह गर्दा समेत आफ्नो छोरीलाई परिक्षाबाट बञ्चित गरिएको बताइन् ।
बिद्यालयले आफ्ना साथीहरुलाई शुल्क नतिरेकै बाहनामा परिक्षा बाट बाहिर राखेको प्रति निकै दुःख लागेको परिक्षामा सहभागी बालबालिकाहरुले प्रतिक्रिया दिएका छन् । ‘समितिका मान्छे र शिक्षकहरु मिलेर साथीहरुलाई परिक्षाबाट बाहिरै राखेपछि दुःख लाग्यो’ – बिद्यालयमा अध्ययनरत एक बालिकाले भनिन् – ‘यस्तो गरेपछि परिक्षा दिएका हामी पनि सबै रोयौ ।’
बिद्यालयले सहयोग शुल्कका नाममा कक्षापिच्छे फरक फरक मासिक शुल्क लिदै आएको छ । यस बिषयमा बिद्यालय ब्यवस्थापन समितिका अध्यक्ष ऋषिराम पौडेल र प्रधानाध्यापक गीता गैरेले बिद्यालयलाई आफूहरुले राम्रै गर्छु भन्दा यस्तो हुन गएको दावी गरेका छन् ।