रामग्राम महिला जेसीजद्धारा पाल्ही मन्दिरलाई नरिवल फुटाउने मेसिन हस्तान्तरण

मोहन पौडेल

२०८१ चैत्र २२, शनिबार प्रकाशित (१ दिन अघि) १७५ पाठक संख्या

परासी, २३ चैत । रामग्राम महिला जेसीज परासीले पाल्ही भगवती मन्दिरलाई नरिवल फुटाउने मेसिन सहयोग गरेको छ ।
पाल्हीनन्न्दन गाउँपालिका–४ मा अवस्थित जिल्लाकै प्रसिद्ध धार्मिक स्थलको रुपमा परिचित पाल्ही मन्दिरलाई आज एक समारोहकाबीच महिला जेसीजले मन्दिरमा आउने भक्तजनको सहजताका लागि नरिवल फुटाउने मेसिन हस्तान्तरण गरेको हो ।
पाल्ही मन्दिर दर्शनका लागि आउने भक्तजनलाई नरिवल फुटाउँदा हुन सक्ने जोखिम न्यूनीरकण गर्न मेसिन सहयोग गरिएको रामग्राम महिला जेसीज वर्ष २०२५ की अध्यक्ष प्रिती कुमारी अग्रहरीले जानकारी दिनुभयो । “देवी देवतालाई नरिवल फुटाएर चढाउने क्रममा चोटपटक लाग्न सक्ने भएकोले व्यवस्थित रुपमा नरिवल फुटाउन सहज हुने गरी मन्दिरमा मेसिन जडान गरिएको हो”, उहाँले भन्नुभयो ।
उक्त मेसिन नेपाल जेसीजका पूर्व राष्ट्रिय कार्यकारीणी उपाध्यक्ष सिनेटर सन्दिप अग्रहरीले सौजन्य गर्नुभएको हो । धार्मिक परम्परा र भावनासँग जोडिएको कार्यलाई प्रविधिको सहयोगमा अझ सहज, सुरक्षित र व्यवस्थित बनाउने उद्देश्यले उक्त मेसिन सहयोग गरेको रामग्राम जेसीजका पूर्व अध्यक्ष समेत रहनुभएका अग्रहरीले बताउनुभयो ।
“परम्परागत रुपमा नरिवल फुटाउने कार्य कहिलेकाँही जोखिमपूर्ण र अव्यवस्थित हुन सक्छ,यस्तो अवस्थामा यो मेसिनले भक्तजनहरुको सुरक्षामा टेवा पुग्ने र मन्दिरमा हुने दैनिक पुजाआजामा सरलता ल्याउने छ”, उहाँले भन्नुभयो ।

मेसिन ग्रहण गर्दै मन्दिरका पुजारी बेदव्यास पाठकले श्रद्धालु भक्तजनलाई सजिलोको लागि महिला जेसीजले गरेको सहयोगप्रति धन्यवाद व्यक्त गर्दै पाल्ही भगवती कोटकी काली माताको दर्शन गर्न थप व्यवस्थित हुने विश्वास व्यक्त गर्नुभयो । रामग्राम महिला जेसीजले चैते दशैँ तथा रामनवमीको अवसर पारी आजै परासीस्थित राधाकृष्ण एवं कालिका मन्दिर र पोखरापालीस्थित हरिओम फाउण्डेसनलाई दुई/दुई थान डष्टविन पनि वितरण गरेको छ ।

कालिका मन्दिरका पुजारी कृष्ण भट्टराई र हरिओम फाउण्डेसनका संरक्षक ओमप्रकाश अग्रहरीलाई उक्त सामग्री हस्तान्तरण गरिएको हो । उक्त अवसरमा रामग्राम महिला जेसीजकी पूर्व अध्यक्ष माया अग्रहरी, प्रविता श्रेष्ठ, रामग्राम जेसीजका निवर्तमान अध्यक्ष मोहन पौडेल, रामग्राम जेसीजका बोर्ड सल्लाहकार राजु देवान लगायतले पनि शुभकामना व्यक्त गर्नुभएको रामग्राम महिला जेसीज वर्ष २०२५ की कार्यकारीणी उपाध्यक्ष बबिता जयसवालले जानकारी दिनुभयो ।