पाल्हीनन्दन गाउँपालिकाको १८ औँ हिउँदे गाउँसभा, विकासको गति बढाउने प्रतिबद्धता

दैनिक 24 खबर

२०८१ चैत्र १८, मंगलबार प्रकाशित (१ दिन अघि) २७० पाठक संख्या

मोहन पौडेल
परासी, १९ चैत । पश्चिम नवलपरासीको पाल्हीनन्दन गाउँपालिकाको १८ औँ गाउँसभाको हिउँदे अधिवेशन मंगलबार सम्पन्न भएको छ । पालिकाको सभाहलमा आयोजित सभाले चालु आर्थिक वर्षका करिब दुई करोड बराबरका योजना तथा कार्यक्रम हेरफेर गरेको छ ।
गाउँपालिका अध्यक्ष बैजुप्रसाद गुप्ता(दीपक)को अध्यक्षतामा भएको उक्त सभाले रकम अपुग भई अधुरा रहेका योजनाका लागि अपुग बजेट विनियोजन गरेको छ भने केही योजनाहरुको रकम रकमान्तर गरिएको छ ।
गाउँसभालाई सम्बोधन गर्दै पालिका अध्यक्ष गुप्ताले पाल्हीनन्दनको विकासले अब तीव्रता पाउने बताउनुभयो । विगत केही वर्षदेखि गाउँपालिकाको विकासले गति लिन नसकेको स्विकार गर्दै अध्यक्ष गुप्ताले अबको बाँकी दुई वर्षलाई पूर्ण सदुपयोग गरी विकास निर्माणलाई प्राथमिकता दिने बताउनुभयो ।
गाउँपालिकाले वितरणमुखी योजनालाई निरुत्साहित गरेको बताउँदै वडा अध्यक्षहरुलाई पनि वितरणमुखी योजना नल्याउन आग्रह गर्नुभयो । उहाँले देखिने गरी विकासको कामलाई अघि बढाउने प्रतिबद्धता व्यक्त गर्नुभयो । अध्यक्ष गुप्ताले कुनै पनि बहानामा काममा ढिलासुस्ती नगर्न कर्मचारीहरुलाई निर्देशन समेत दिनुभयो ।
गाउँपालिका उपाध्यक्ष फातिमा खातुन अन्सारीले अन्य पालिकाको तुलनामा पाल्हीनन्दन पछाडि परेको बताउँदै सबै जनप्रतिनिधि र कर्मचारी मिलेर पालिकालाई अब्बल बनाउनुपर्नेमा जोड दिनुभयो । उहाँले विकासको काममा सबै मिल्नुपर्ने बताउँदै आफूहरु पालिकाको विकास र पालिकावासीको सेवाका लागि निरन्तर लागिरहेको उल्लेख गर्नुभयो ।