नवलपरासीबाट अख्तियारमा १३६ उजुरी दर्ता, भ्रष्टाचार विरुद्ध सचेतना जगाउँदै सिटिजन जुरी

२०८१ चैत्र १३, बिहिबार प्रकाशित (६ दिन अघि) २०२ पाठक संख्या

मोहन पौडेल
परासी, १४ चैत । अख्तियार दुरुपयोग अनुसन्धान आयोगको कार्यालय बुटवलमा पश्चिम नवलपरासीबाट चालु आर्थिक वर्षमा एक सय ३६ उजुरी दर्ता भएका छन् । दर्ता भएका उजुरी मध्ये ७९ वटा फछ्यौट भएको र बाँकी रहेका ५७ वटा उजुरी छानविनको क्रममा रहेको छ ।
अख्तियारको तथ्यांक अनुसार नवलपरासीबाट उजुरी गर्ने क्रम बढ्दो छ । गत आर्थिक वर्षमा ८६ वटा मात्र उजुरी परेकोमा यो वर्ष १३६ पुगेको छ । भ्रष्टाचार विरुद्धको नागरिक निगरानी संस्था (सिटीजन जुरी) पश्चिम नवलपरासीले आज सरावल गाउँपालिकामा आयोजना गरेको विकास निर्माण तथा सार्वजनिक सेवा प्रवाहमा सुशासन विषयक सार्वजनिक बहस कार्यक्रममा उक्त जानकारी गराईएको हो ।
भ्रष्टाचार नियन्त्रणमा सचेतना जगाउने उद्देश्यले उक्त कार्यक्रम गरिएको थियो । कार्यक्रममा अख्तियार बुटवल कार्यालयका शाखा अधिकृत नवराज भण्डारीले चालु आर्थिक वर्ष २०८१।०८२ को हालसम्ममा जिल्लाका सात स्थानीय तह मध्ये सुनवल नगरपालिका अन्र्तगत ३१ वटा उजुरी परेकोमा २३ वटा उजुरी फछ्यौट भई ८ वटा अनुसन्धानमा रहेको जानकारी दिनुभयो ।
उहाँका अनुसार बर्दघाट नगरपालिकाबाट ३० वटा उजुरी परेकोमा १७ वटा फछ्यौट भई १३ उजुरी छानविनको क्रममा छन् । पाल्हीनन्दन गाउँपालिकाबाट पनि ३० वटा उजुरी दर्ता भएकोमा १३ वटा फछ्यौट भई १७ वटा छानविनमा रहेका छन्।
रामग्राम नगरपालिकाबाट २१ वटा उजुरी दर्ता भएका छन् । त्यस मध्ये १४ वटा फछ्यौट भई १३ वटा उजुरी माथि छानविन भईरहेको अख्तियारले जनाएको छ । सरावल गाउँपालिकाबाट १५ वटा उजुरी परेकोमा १० वटा फछ्यौट भएको छ । बाँकी ५ वटा उजुरी माथि छानविन भईरहेको छ । प्रतापपुर गाउँपालिकाबाट ८ वटा उजुरी परेकोमा एउटा फछ्यौट भई सात वटा उजुरी छानविनको क्रममा छ । सुस्ता गाउँपालिकाबाट एउटा उजुरी दर्ता भएकोमा फछ्यौट भईसकेको अधिकृत भण्डारीले बताउनुभयो ।
उजुरीहरु स्थानीय तहका मात्र नभई उक्त स्थानीय तह अन्र्तगत तीनै तहका निकाय विरुद्धका उजुरी रहेको अख्तियारले जनाएको छ । बुटवल कार्यालयले दर्ता भएका उजुरीको प्रारम्भीक छानविन तथा अभियोजन गर्ने गर्दछ ।
लुम्बिनी प्रदेशका नौ जिल्ला कार्यक्षेत्र रहेको अख्तियार बुटवल कार्यालयमा चालु आर्थिक वर्षको हालसम्ममा कूल एक हजार २८८ वटा उजुरी दर्ता भएका छन् । त्यस मध्ये ७४३ फछ्यौट भई ५४५ उजुरी छानविनको क्रममा रहेको अख्तियारले जनाएको छ ।
कार्यक्रममा सहभागिहरुले गाउँपालिकाको पहुँच मार्ग निर्माणमा ढिलासुस्ती भएको, सरकारी कार्यालयमा छड्के जाँच हुन छोडेको, जिल्ला दररेट नमिल्दा निर्माण कार्यमा समस्या भईरहेको, लापरवाही गर्ने ठेकेदारलाई सरकारले कारवाही गर्न नसकेको लगायतका गुनासो गरेका थिए ।
सिटीजन जुरीका अध्यक्ष रामजी ज्ञवालीले जिल्लामा भ्रष्टाचार विरुद्ध सचेतना जगाउने,सार्वजनिक निकायको सेवा प्रवाहमा सुशासन कायम गर्न खवरदारी गर्ने,भ्रष्टाचार नियन्त्रणमा अख्तियारलाई सहयोग गर्ने लगायतका कार्यहरु सिटीजन जुरीले गरिरहेको बताउनुभयो ।
उक्त अवसरमा जिल्ला समन्वय समितिका प्रमुख भगौती यादव(रुदल), सरावल गाउँपालिका अध्यक्ष सुखाडी प्रसाद चौधरी, अख्तियार बुटवल कार्यालयका अधिकृत नवराज भण्डारी, करदाता सेवा कार्यालय परासीका प्रमुख पर्शुराम पोखरेल लगायतले सहभागिहरुको जिज्ञासाको सम्बोधन गर्नुभएको थियो ।