चलचित्र आउटलःदफा २१९को टिम परासीमा, दर्शकको साथले उत्साहीत

दैनिक 24 खबर

२०८१ चैत्र ६, बिहिबार प्रकाशित (१ हफ्ता अघि) १३५ पाठक संख्या

मोहन पौडेल
परासी, ७ चैत । दर्शकको राम्रो साथ पाएपछि गत विहीबारबाट प्रदर्शनमा आएको नेपाली कथानक चलचित्र आउटल ः दफा २१९ को निर्माण पक्ष उत्साहित देखिएको छ । प्रदर्शनको एक हप्तामै चलचित्रले उत्साहजनक व्यापार गर्नुका साथै दर्शकको सकारात्मक प्रतिक्रियाका कारण आफूहरुलाई हौसला बढेको उक्त चलचित्रका मूख्य अभिनेता शुशिल श्रेष्ठले बताउनुभयो ।
चलचित्र प्रदर्शनसँगै देश दौडाहाको क्रममा विहीबार परासी आउनुभएका नायक श्रेष्ठले दैनिक ट्वान्टीफोर खबरलाई प्रतिक्रिया दिँदै उक्त कुरा बताउनुभएको हो । एक्सनले भरिएको यो चलचित्रमा समावेश गरिएको कथावस्तु, प्रस्तुती र एक्सनलाई दर्शकले विशेष मन पराएका छन् । दर्शकको अथाह साथ रहेकोले चलचित्रको दोस्रो भाग पनि ल्याउने सोचमा रहेको नायक श्रेष्ठले बताउनुभयो ।
सामाजिक कथामा एक्सन मिश्रण गरी निर्माण गरिएको यो चलचित्रले न्यायको विषयलाई उठान गरेको छ । चलचित्रका निर्माता अमित अग्रहरीले बक्स अफिसमा चलचित्रले राम्रो कमाई गरिरहेको बताउनुभयो । हलिउड, बलिउड चलचित्रकै लेभलमा रहेर नयाँ तरिकाको मेकिङ,एक्सन तथा सामाजिक कथामा आधारित चलचित्र रहेकोले दर्शकको आकर्षण देखिएको उहाँको भनाई छ ।
विक्की महर्जनको लेखन तथा निर्देशन रहेको चलचित्र आउटलः दफा २१९ मा नायक श्रेष्ठसँगै नरेश पौडेल, शिक्षा संग्रौला लगायतको मूख्य भूमिका रहेको छ । विहीबार परासी आएको चलचित्र युनिटलाई नवलपरासी उद्योग वाणिज्य संघका अध्यक्ष ओमप्रकाश अग्रहरी लगायतले स्वागत गर्नुभएको थियो ।