नवलपरासीको सुनवलमा चैत १९ देखि अन्तर प्रदेश राष्ट्रिय पुरुष कबड्डी प्रतियोगिता हुँदै

दैनिक 24 खबर

२०८० चैत्र १६, शुक्रबार प्रकाशित (७ महिना अघि) २९० पाठक संख्या

मोहन पौडेल
परासी, १६ चैत । पश्चिम नवलपरासीको सुनवलमा मुख्यमन्त्री अन्तर प्रदेश राष्ट्रिय पुरुष कबड्डी प्रतियोगिता हुने भएको छ । यही चैत १९ देखि २१ गतेसम्म हुने उक्त प्रतियोगिता सुनवल १ स्थित लुम्बिनी चिनी मिलको सी गेट मैदानमा हुनेछ ।
जिल्ला खेलकुद विकास समिति नवलपरासीको आयोजना, जिल्ला कबड्डी संघको सहआयोजना, लुम्बिनी प्रदेश खेलकुद परिषदको प्रवद्र्धन र लुम्बिनी प्रदेश कबड्डी संघको समन्वयमा राष्ट्रिय प्रतियोगिता आयोजना हुन लागेको हो ।
प्रतियोगितामा सात वटै प्रदेशको टीमले सहभागिता जनाउने छन् भने विजेता टीमले नगद रु एक लाख पचास हजार, मेडल र प्रमाणपत्र, उपविजेता टीमले नगद रु एक लाख, मेडल र प्रमाणपत्र प्राप्त गर्ने जिल्ला खेलकुद विकास समितिका अध्यक्ष रितमान कामू मगरले जानकारी दिनुभयो । उहाँका अनुसार सेमिफाईनलमा पुग्ने समूहलाई पनि नगद रु पचास÷पचास हजार प्रदान गरिनेछ । प्रत्येक प्रदेशबाट १२ खेलाडिसहित १४ जनाको टीमले सहभागिता जनाउनेछन् ।
कबड्डी खेलका लागि उर्वर मानिने नवलपरासीलाई राष्ट्रिय स्तरमा चिनाउन यो प्रतियोगिताले ठूलो योगदान गर्ने अध्यक्ष मगरको भनाई छ । प्रतियोगिताका लागि आवश्यक तयारी तीव्र रुपमा भईरहेको जिल्ला खेलकुद विकास समितिका उपाध्यक्ष रमेश कर्माचार्यले जानकारी दिनुभयो ।
यस प्रतियोगितामा उत्कृष्ट हुने खेलाडिले बंगलादेशमा हुने बंगबन्धु अन्तर्राष्ट्रिय कबड्डी प्रतियोगितामा सहभागि हुने उहाँले जानकारी दिनुभयो । यसैबीच सुनवलमा हुने राष्ट्रिय कबड्डी प्रतियोगितामा लुम्बिनी प्रदेशको तर्फबाट खेल्ने खेलाडिहरु छनौट गरिएको छ । चैत १३ देखि सुनवलमै छनौट प्रतियोगिता सञ्चालन गरि खेलाडि छनौट गरिएको आयोजकले जनाएको छ ।