पाल्हीनन्दनमा दोस्रो राष्ट्रपति रनिङ शिल्ड प्रतियोगिता शुरु,खेल मैदान निर्माणमा पहल गर्ने कँडेलको भनाई

दैनिक 24 खबर

२०८० माघ २२, सोमबार प्रकाशित (९ महिना अघि) ४२९ पाठक संख्या

मोहन पौडेल
परासी, २२ माघ । पश्चिम नवलपरासीको पाल्हीनन्दन गाउँपालिकामा पालिका स्तरीय दोस्रो राष्ट्रपति रनिङ शिल्ड प्रतियोगिता शुरु भएको छ । गाउँपालिकाको आयोजना तथा हरपुर मावि पाल्हीनन्दन २ को व्यवस्थापनमा आज एक कार्यक्रमकाबीच प्रतियोगिताको उद्घाटन गरिएको हो ।
आगामी माघ २४ गते सम्म सञ्चालन हुने प्रतियोगिताको उद्घाटन गर्दै पूर्व गृहराज्यमन्त्री देवेन्द्रराज कँडेलले पाल्हीनन्दनमा पूर्वाधारसहितको खेल मैदान निर्माणका लागि पहल गर्ने बताउनुभयो । त्यसका लागि उपयुक्त स्थानको छनौट गरि डिपिआर बनाउन उहाँले गाउँपालिकालाई आग्रह गर्नुभयो । खेलकुदले अनुशासन सिकाउने भन्दै उहाँले त्यही अनुशासनले जीवन पनि अनुशासित बनाउने र राष्ट्रका लागि असल नागरिक उत्पादनमा सहयोग पुग्ने धारणा व्यक्त गर्नुभयो ।
नेता कँडेलले आफूले यस क्षेत्रबाट चुनाव हारेपनि विकासका लागि पहल गरिरहेको बताउनुभयो । महेशपुरदेखि सुनवलसम्मको सडक विस्तारलाई पूर्णता दिने,गोपालपुर मुडेरा सडक लगायतका सडक निर्माणका लागि पनि पहल गर्ने बताउँदै उहाँले चुनावमा उपविजेता भएपनि आफू जनतासँगै रहेको बताउनुभयो ।
पाल्हीनन्दन गाउँपालिका अध्यक्ष बैजुप्रसाद गुप्ता(दीपक)ले विद्यालय तहबाटै खेलाडि उत्पादन गर्ने उद्देश्यले गाउँपालिकाले दोस्रो पटक राष्ट्रपति रनिङ शिल्ड प्रतियोगितालाई निरन्तरता दिएको बताउनुभयो । उहाँले खेलकुद क्षेत्रले नागरिक स्वस्थ हुने, राष्ट्रको पहिचान बढ्ने, असल नागरिक उत्पादनमा टेवा पुग्ने भएकोले गाउँपालिकाले खेल क्षेत्रलाई प्राथमिकता दिँदै आएको बताउनुभयो । अध्यक्ष गुप्ताले गाउँपालिकाका अन्य सडक पूर्वाधार, तरकारीको बजारीकरण लगायतका क्षेत्रमा आवश्यक सहजीकरण गरिदिन संघ र प्रदेशमा प्रतिनिधित्व गर्ने सांसदहरुलाई आग्रह गर्नुभयो ।
कार्यक्रममा लुम्बिनी प्रदेशसभा सदस्य द्धय बैजनाथ जयसवाल, खड्ग बस्नेत, जिल्ला समन्वय समितिका प्रमुख भगौती यादव(रुदल), गाउँपालिका उपाध्यक्ष फातिमा खातुनन अन्सारी लगायतले शुभकामना व्यक्त गर्नुभएको थियो । प्रतियोगितामा गाउँपालिका भित्रका १५ विद्यालयको सहभागिता रहेको आयोजकले जनाएको छ ।