भुकम्प प्रभावित क्षेत्रमै पुगेर पाल्हीनन्दन गाउँपालिका अध्यक्ष गुप्ताद्धारा पीडितलाई राहत वितरण

दैनिक 24 खबर

२०८० कार्तिक २४, शुक्रबार प्रकाशित (१0 महिना अघि) ४३७ पाठक संख्या

मोहन पौडेल
परासी, २४ कात्तिक । पश्चिम नवलपरासीको पाल्हीनन्दन गाउँपालिकाका अध्यक्ष बैजुप्रसाद गुप्ता(दीपक)ले भुकम्प प्रभावित क्षेत्र रुकुम पश्चिम पुगेर त्यहाँका भुकम्प पीडितलाई राहत सामग्री उपलब्ध गराउनुभएको छ । गत कात्तिक १७ गते कर्णाली प्रदेशको जाजरकोटको रामीडाँडा केन्द्रविन्दु भएर गएको विनाशकारी भुकम्पका कारण पीडित भएका नागरिकलाई अध्यक्ष गुप्ताले प्रभावित क्षेत्रमै पुगेर राहत हस्तान्तरण गर्नुभएको हो ।
पाल्हीनन्दन गाउँकार्यपालिकाको निर्णय बमोजिम रु तीन लाख बराबरको राहत सामग्री बोकेर अध्यक्ष गुप्ता रुकुम पश्चिम पुग्नुभएको थियो । पाल्हीनन्दन गाउँपालिकाको तर्फबाट लगिएको राहत सामग्री अध्यक्ष गुप्ताले रुकुम पश्चिमको सानिभेरी गाउँपालिकाका अध्यक्ष विर्ख बहादुर विष्टमार्फत भुकम्प पीडितलाई उपलब्ध गराउनुभएको हो ।
जाजरकोट भुकम्पबाट क्षतिग्रस्त बनेको सानिभेरी गाउँपालिकामा पुगेर जिल्ला प्रशासन कार्यालय रुकुम पश्चिमसँगको समन्वयमा प्रभावितलाई राहत उपलब्ध गराएको अध्यक्ष गुप्ताले जानकारी दिनुभयो । चामल,चिउरा,कम्बल,त्रिपाल,साबुन,सरफ,सेनेटरी प्याड गरि रु तीन लाख बराबरको राहत सामग्री प्रभावित क्षेत्रका नागरिकका लागि उपलब्ध गराएको प्रभावित क्षेत्रबाट पाल्हीनन्दन गाउँपालिका अध्यक्ष गुप्ताले बताउनुभयो ।
विनाशकारी भुकम्पका कारण जाजरकोट र रुकुम पश्चिममा गरि १५३ जनाको मृत्यु भएको थियो भने सयौँ घाईते भएका थिए। भुकम्पपछि सरकारले पीडितहरुको तत्काल उद्धार गरेपनि राहत वितरण, अस्थायी बासस्थान निर्माणमा भईरहेको ढिलाईले पीडितहरु समस्यामा छन् । रुकुम पश्चिम पुग्नुभएका अध्यक्ष गुप्ताले त्यहाँ भुकम्पका कारण क्षतिग्रस्त बनेको संरचनाको अवलोकन गर्दै पीडितहरुको अवस्थाबारे जानकारी पनि लिनुभएको थियो ।