भुकम्प पीडितलाई दुई लाख राहत रकम प्रदान गर्ने सरावल गाउँपालिकाको निर्णय

मोहन पौडेल

२०८० कार्तिक २०, सोमबार प्रकाशित (१0 महिना अघि) ४४५ पाठक संख्या

परासी,२० कात्तिक । पश्चिम नवलपरासीको सरावल गाउँपालिकाले जाजरकोट र रुकुम पश्चिमका भुकम्प पीडितलाई राहत रकम प्रदान गर्ने निर्णय गरेको छ । आज बसेको गाउँ कार्यपालिका बैठकले जाजरकोट भुकम्प पीडितलाई गाउँपालिकाको तर्फबाट दुई लाख रुपैयाँ सहयोग गर्ने निर्णय गरिएको गाउँपालिका अध्यक्ष सुखाडी प्रसाद चौधरीले जानकारी दिनुभयो ।

कात्तिक १७ गते जाजरकोटको रामीडाँडा केन्द्रविन्दु भएर गएको भुकम्पका पीडितहरूको उद्धार, राहत र पुनर्स्थापनाका लागि दुई लाख रुपैयाँ उपलब्ध गराउने निर्णय गरिएको अध्यक्ष चौधरीले बताउनुभयो ।
गाउँपालिकाले भूकम्पमा परी मृत्यु भएकाहरू प्रति श्रद्धाञ्जली व्यक्त गर्दै मृतकका परिवारजनमा समवेदना र घाइतेहरूको शीघ्र स्वास्थ्यलाभको कामना गरेको छ ।

गाउँपालिकाको तर्फबाट उक्त रकम नेपाल सरकारको सरकारी विपत् कोष मार्फत पीडितहरूको लागि पठाइने जनाएको छ । सरावल गाउँपालिकाले पीडितहरूको उद्धार, राहत र पुनर्स्थापनाका लागि सहयोग गर्न सबैमा अनुरोध समेत गरेको छ । साथै पालिकाका विभिन्न सरोकारवालाको पहलमा राहत संकलन कार्य भईरहेको समेत गाउँपालिकाले जनाएको छ ।
जाजरकोट भूकम्पका कारण १५३ जनाको ज्यान गएको छ भने सयौं घाइते छन् । उक्त भुकम्पबाट ३५ हजार ३२१ घरमा क्षति भएको छ । तीमध्ये १७ हजार ७९२ घर पूर्णरूपले नष्ट भएका छन् । १७ हजार ५२९ घरमा आंशिक क्षति भएको छ ।
सबैभन्दा बढी रुकुम पश्चिममा १६ हजार ५७० घर पूर्णरूपले नष्ट भएका छन् । त्यसपछि जाजरकोटमा एकजार १७० घर नष्ट भएका छन् । शुक्रबार राति गएको भूकम्पबाट ठूलो जनधनको क्षति भएको छ ।