नवलपरासीमा स्रोत नखुलेको साढे १६ लाख रुपैँयासहित एक जना पक्राउ

मोहन पौडेल

२०८० कार्तिक १६, बिहिबार प्रकाशित (१ साल अघि) २८४४ पाठक संख्या

परासी, १६ कात्तिक । प्रहरीले स्रोत नखुलेको रकमसहित एक जनालाई पक्राउ गरेको छ । जिल्ला प्रहरी कार्यालय पश्चिम नवलपरासीबाट खटिएको टोलीले रामग्राम नगरपालिका–७ उजैनीबाट स्रोत नखुलेको रकमसहित पाल्हीनन्दन गाउँपालिका–२ हरपुर बस्ने २५ वर्षीय ईमरान खानलाई आज दिउँसो पक्राउ गरेको हो ।
जिल्ला प्रहरी कार्यालय परासीका प्रवक्ता प्रहरी नायव उपरीक्षक रेशम बोहराले १६ लाख ५० हजार नेपाली रुपैँयासहित खानलाई पक्राउ गरिएको जानकारी दिनुभयो । उजैनीस्थित परासी–महेशपुर सडक खण्डमा महेशपुरबाट परासीतर्फ आउँदै गरेको लु ९० प ७८८५ नम्बरको मोटरसाईकललाई जाँच गर्ने क्रममा मोटरसाईकलमा सवार खानले बोकेको झोलाबाट स्रोत नखुलेको एक हजार दरका सात सय थान र ५ सय थानका एक हजार ९ सय थान गरि रु १६ लाख पचास हजार नेपाली रुपैँया बरामद गरिएको डिएसपी बोहराले जानकारी दिनुभयो । नियन्त्रणमा लिएका खानमाथी आवश्यक कारवाही प्रक्रिया अघि बढाईएको प्रहरीले जनाएको छ ।