आर्थिक स्रोतका लागि व्यावसायिक भवन निर्माण गर्दै सरस्वती मावि शान्तिचौर

मोहन पौडेल

२०८० कार्तिक १५, बुधबार प्रकाशित (१ साल अघि) ५६७ पाठक संख्या

परासी, १५ कात्तिक । पश्चिम नवलपरासीको रामग्राम नगरपालिका–१२ शान्तिचौर कशियास्थित सरस्वती माविले आर्थिक स्रोत जुटाउन व्यवसायिक सटर भवन निर्माण गर्ने भएको छ । विद्यालयको आफ्नै आम्दानी नहुँदा निजी स्रोतका शिक्षकलाई तलब खुवाउन तथा थप शिक्षक पूर्ति गर्न समस्या भएपछि विद्यालयले व्यवसायिक सटर भाडामा लगाएर आम्दानी जुटाउने पहल थालेको हो ।
विद्यालय परिसरमा निर्माण हुने व्यवसायिक भवनको आज रामग्राम नगरपालिकाका नगर प्रमुख धनपत यादवले शिलान्यास गर्नुभयो । विद्यालयमा व्यवसायिक भवन निर्माण गर्न रामग्राम नगरपालिकाले रु पचास लाख बजेट उपलब्ध गराएको नगर प्रमुख यादवले बताउनुभयो । विद्यालयलाई सक्षम बनाई शैक्षिक गुणस्तर बढाउन विद्यालयलाई उक्त सहयोग गरिएको उहाँले बताउनुभयो ।
विद्यालयको आफ्नै आन्तारिक आम्दानीको स्रोत नहुँदा शिक्षकहरुलाई उचित पारिश्रमिक दिन र थप शिक्षक पूर्ति गर्न समस्या रहेको विद्यालयका प्रधानाध्यापक दयानन्द चौधरीले बताउनुभयो । व्यवसायिक सटर निर्माण गरि भाडामा लगाएर प्राप्त आम्दानीबाट शिक्षकलाई तलब व्यवस्थापन गरिने उहाँले बताउनुभयो ।
आगामी तीन महिना भित्र चार वटा व्यवसायिक सटर निर्माण हुने गरि काम शुरु भएको रामग्राम नगरपालिकाका ईन्जिनियर महेश्वर ठाकुरले बताउनुभयो । उहाँका अनुसार लुम्बिनी विल्डर्स एण्ड कन्स्ट्रक्सन्स रामग्रामले आगामी माघ ७ गते भित्र सम्पन्न गर्ने गरि रु ३५ लाख ३९ हजार ६१८ मा ठेक्का सकार गरेको छ । उक्त अवसरमा उपमेयर सम्झना चौधरी, वडा अध्यक्ष लोकबहादुर चौधरी, नगरपालिकाका ईन्जिनियर माधव न्यौपाने, महेश्वर ठाकुर लगायतको पनि सहभागिता रहेको थियो ।