हिन्दु स्वयमसेवक संघद्धारा सुनवलमा सात दिने संस्कार शिक्षा वर्ग प्रशिक्षण

मोहन पौडेल

२०८० कार्तिक १५, बुधबार प्रकाशित (१0 महिना अघि) ३४४ पाठक संख्या

परासी, १५ कात्तिक । धर्म, संस्कार, संस्कृतिलाई जोगाउन हिन्दु स्वयमसेवक संघ नेपालले पश्चिम नवलपरासीमा प्राथमिक शिक्षा वर्ग प्रशिक्षण कार्यक्रम सञ्चालन गरेको छ । जिल्लाका सातै पालिकाका बालबालिकाहरुको सहभागितामा सुनवलको खकरीबारीमा सप्ताहव्यापी प्रशिक्षण सञ्चालनमा रहेको छ ।
असल व्यक्तित्व निर्माण गर्ने उद्देश्यले दश वर्षदेखि २२ वर्षसम्मका जिल्लाका १०३ जना बालबालिका तथा युवाहरुलाई सहभागि गराई प्रशिक्षित गराईने हिन्दु स्वयमसेवक संघले जनाएको छ । कात्तिक ९ गतेबाट शुरु भएको असल संस्कार कक्षाको शुभारम्भ सुनवल नगरपालिकाकी मेयर बिमला अर्यालले गर्नुभएको थियो ।

होम गरेर शुरु गरिएको प्रशिक्षण कार्यक्रम अन्र्तगत प्रत्येक दिन विहान देखि साँझ सम्म सहभागिहरुलाई शारीरिक, मानसिक,मानसिक, बैचारिक, बौद्धिक कक्षाको माध्यमबाट प्रशिक्षण गराईरहेको आर्थिक संयोजक विष्णुप्रसाद पौडेलले जानकारी दिनुभयो ।

हिन्दु धर्म संस्कृति,संस्कार र परम्परालाई जोगाउने उद्देश्यले कक्षा सञ्चालन गरिएको उहाँले बताउनुभयो । कक्षामा असल संस्कार र नैतिक शिक्षा प्रदान गरिएको छ । आज कात्तिक १५ गते सुनवलमा बृहत र्याली पनि आयोजना हुने आयोजकले जनाएको छ । प्रशिक्षण कात्तिक १६ गते समापन हुनेछ ।