भारत हुँदै कुवेत लैजान लागिएका चार नेपाली महिलाको सीमा नाका महेशपुरबाट उद्धार,एक पुरुष पक्राउ

दैनिक 24 खबर

२०७९ आश्विन ९, आईतबार प्रकाशित (२ साल अघि) ४२० पाठक संख्या

मोहन पौडेल
परासी, ९ असोज । भारत हुँदै कुवेत लैजान लागिएका चार नेपाली महिलाको सीमा नाकाबाट उद्धार गरिएको छ । अवैद्य रुपमा भारतको बाटो हुँदै कुवेत जान लागेका महिलाहरुलाई जिल्ला प्रहरी कार्यालय पश्चिम नवलपरासीले पाल्हीनन्दन गाउँपालिका–१ महेशपुरस्थित नेपाल–भारत सीमा क्षेत्रबाट माईती नेपाल र आफन्त नेपालको सहयोगमा उद्धार गरेको हो ।
प्रहरीले ती युवतीहरुलाई ललाई फकाई सीमा पार गराउँदै गरेका एक जना पुरुषलाई पनि पक्राउ गरेको छ । मानव बेचविखन कार्यमा संलग्न रहेकोले जाजरकोट छेडाघाटन वडा नं. १२ जन्म घर भई बर्दिया बाँसगडी नगरपालिका वडा नं. ६ ढकेना स्थायी घर भई हाल पश्चिम नवलपरासीको बर्दघाट नगरपालिका वडा नं. ४ बाढीपीडित बस्ने वर्ष ३५ को गोरख दमाईलाई नियन्त्रणमा लिएको जिल्ला प्रहरी कार्यालयका सूचना अधिकारी डिएसपी भोजराज पाण्डेले जानकारी दिनुभयो ।
प्रहरीले काभ्रेको रुप्ची गाउँपालिका वडा नं. ५ सिसाखानीकी २७ वर्षीय महिला, सिन्धुली नेत्रकालीकी २० वर्षीय महिला,काभ्रे तेमाल गाउँपालिका वडा नं. २ चुँगा बस्ने वर्ष २१ के महिला र धनकुटा महालक्ष्मी नगरपालिका वडा नं. ८ वस्ने वर्ष २३ की महिलाको उद्धार गरेको उहाँले बताउनुभयो ।
उद्धार गरिएका महिलाहरुलाई आफन्तको जिम्मा लगाईएको छ भने बेचबिखनमा संलग्न दमाईलाई जिल्ला अदालतबाट पाँच दिनको म्याद थप गरी अनुसन्धान थालिएको प्रहरीले जनाएको छ । पक्राउ परेका दमाईसहितका व्यक्तिहरले राम्रो पैसा कमाई हुने र कुनै खर्च नलाग्ने भनी युवतीहरुलाई ललाईफकाई सीमा नाक पार गराउन लागेको युवतीहरुले बताएका छन् । घटनामा संलग्न अन्य व्यक्तिहरुको पनि खोजी भईरहेको प्रहरीले जनाएको छ ।