सामुदायिक वन महासंघद्धारा रेडप्लस प्रक्रियाबारे बहुसरोकारवालासंग छलफल

दैनिक 24 खबर

२०७९ भाद्र २६, आईतबार प्रकाशित (२ साल अघि) ४७३ पाठक संख्या

नवलपरासी , २६ भदौ । पश्चिम नवलपरासीको सुनवल नगरपालिकामा रेडप्लसको प्रक्रियाबारेमा बहुसरोकारवालासंग छलफल गरिएको छ । सामुदायिक बन उपभोक्ता महासंघ नेपाल जिल्ला महासंघ नवलपरासीको आयोजनमा रेडप्लस र यसको प्रक्रियाको विषयमा सरोकारवालासँग छलफल गरिएको हो ।

वन विनास र वन क्षयीकरणको कारण मानिसको जीबिकोपार्जन र समग्र राष्ट्रिय बिकासमा प्रतिकुल प्रभाव पादै आएको बताउदै बन बिनाश र वन क्षयीकरण समस्या सम्बोधनका लागि नेपालले रेडप्लस कार्यक्रम सामुदायिक बनहरुमा संचालन गरेको सहजीकर्ता रमेश तिमिल्सिनाले बताउनुभयो ।

वन विनाश तथा वन क्षयीकरणबाट हुने कार्वन उत्सर्जनलाई न्यूनीकरण गर्ने, वनको प्रभावकारी संरक्षण गर्ने र यसको दीगो व्यवस्थापनमार्फत कार्वन क्षमता सञ्चिति क्षमता अभिवृद्धि गराउने कार्य गरे वापत विकासन्मुख देशलाई विकसित देशहरुबाट प्रोत्साहन स्वरुप प्राप्त हुने भुक्तानीलाई रेडप्लस भनिन्छ ।

विभिन्न बहानामा हुने वन अतिक्रमणका कारण वन विनाश र वन क्षयीकरण भईरहेकोले रेडप्लस कार्यक्रम प्रभावकारी हुने उहाँले बताउनुभयो ।

रेडप्लस कार्यक्रम तराईका १३ जिल्लाको सामुदायिक बनहरुमा संचालन भईरहेको सामुदायिक वन उपभोक्ता महासंघकी सदस्य सुमित्रा भट्टराईले बताउनुभयो । पश्चिम नवलपरासीसहित रौतहाट बारा,पर्सा,नवलपरासी पूर्व नवलपुर,चितवन,बार्दिया,बाके,दाङ्ग,कपिलबस्तु,रुपन्देही र सुदुरपश्चिम प्रदेशको कञ्चानपुर र कैलालीमा यो कार्यक्रम सञ्चालन गरिएको छ ।

नेपालको राष्ट्रिय रेडप्लस रणनीतिका विषयमा सहजीकरण गर्दै सहजकर्ता लुमाकान्त भुसालले वन संरक्षण र दीगो व्यवस्थापनमा जोड दिनुभयो । सामुदायिक बन उपभोक्ता महासंघका अध्यक्ष कमल परिवारको अध्यक्षता तथा लुम्बिनी प्रदेशका सचिवालय सदस्य नारायाण पाण्डेको प्रमुख आथिथ्यमा भएको उक्त कार्यक्रम भएको थियो ।

महासंघकी जिल्ला सचिव शारदा पोखरेलका अनुसार नवलपरासी जिल्लामा ६३ वटा सामुदायिक बन रहेका छन् भने ४२ हजार एक सय ११ घरधुरीका दुई लाख ५५ हजार ६१ जनसख्या लाभावन्ति छन्