रामग्राम-५ का समाजसेवी गुप्ताद्धारा ज्येष्ठ नागरिकलाई नि:शुल्क तीर्थयात्रा

मोहन पौडेल

२०७९ श्रावण २, सोमबार प्रकाशित (२ साल अघि) १३८९ पाठक संख्या

परासी, २ साउन । पश्चिम नवलपरासीको परासीका एकजना समाजसेवीले आफ्नो खर्चमा वडाका ज्येष्ठ नागरिकलाई नि:शुल्क तीर्थयात्रा गराउनुभएको छ ।
रामग्राम नगरपालिका वडा नं.५ निवासी समाजसेवी सन्तोष कुमार गुप्ताले सोही वडाका ५१ जना ज्येष्ठ नागरिकलाई आज तीर्थयात्रा गराउनुभएको हो ।
साउन महिनाको सोमबारको अवसर पारी पवित्र तीर्थ स्थल त्रिवेणीधामदेखि पर्रोहा धामसम्म ज्येष्ठ नागरिकहरुलाई तीर्थयात्रा लगिएको गुप्ताले बताउनुभयो ।
तीर्थयात्रामा जान पाउँदा ज्येष्ठ नागरिक पनि खुसी भएका थिए । मन हुँदाहुँदै पनि आर्थिक अभावका साथै विभिन्न कारणले घुम्न नपाएका तथा समाजका लागि विशेष योगदान दिने ज्येष्ठ नागरिकहरु समाजका सम्पत्ति भएकोले उहाँहरूको सम्मानमा तीर्थयात्रा गराएको गुप्ताको भनाइ छ।