पश्चिम नवलपरासीमा कांग्रेसको जिल्ला अधिवेशन – मतदान सम्पन्न, मतगणना जारी

दैनिक 24 खबर, मोहन पौडेल

२०७८ मंसिर १०, शुक्रबार प्रकाशित (२ साल अघि) ७०३ पाठक संख्या

परासी, १० मंसिर। नेपाली कांग्रेसको १४ औँ महाधिवेशन अन्र्तगत कांग्रेस पश्चिम नवलपरासीको जिल्ला नेतृत्व चयनका लागि आज मतदान सम्पन्न भएको छ । परासीस्थित सरस्वती मावि शान्तिचौरमा विहान साढे ८ बजेदेखि शुरु भएको मतदान साँझ चार बजे सकिएको हो ।
कुल १३ सय ४६ मतदाता रहेकोमा आज सम्पन्न मतदानमा १३ सय २९ मत खसेको मतदान अधिकृत दीपक भट्टराईले जानकारी दिनुभयो । अहिले कांग्रेस जिल्ला पार्टी कार्यालय विपी स्मृत्ति भवन परासीमा मतगणना भईरहेको उहाँले बताउनुभयो ।
नेपाली कांग्रेस जिल्ला कार्य समितिको सभापति पदका लागि अर्जुन पोखरेल र मोहन शर्मा प्यानलसहित चुनावी मैदानमा हुनुहुन्छ । पोखरेल रामचन्द्र पौडेल पक्ष र शर्मा शेर बहादुर देउवा पक्षको रुपमा चिनिनुहुन्छ ।
जिल्लामा देउवा खेमाबाट केन्द्रिय सदस्य देवेन्द्रराज कण्डेल र पौडेल खेमाबाट संविधानसभा सदस्य विक्रम खनाल पक्षबीच वडा तहदेखि नै प्रतिस्पर्धा रहेको छ । कांग्रेसको वडा, गाउँ नगर, प्रतिनिधिसभा र प्रदेशसभा सम्मको निर्वाचन सकिँदा पश्चिम नवलपरासीमा पौडेल पक्षको वचस्र्व देखिएको छ ।