विद्यार्थी बेहोस हुन थालेपछि परासीको आदर्श माविको पठनपाठन बन्द, विद्यार्थीको उपचार हुँदै

दैनिक 24 खबर

२०७९ फागुन १५, सोमबार प्रकाशित (१ साल अघि) १०७७ पाठक संख्या

मोहन पौडेल
परासी, १५ फागुन । पश्चिम नवलपरासीको परासीस्थित आदर्श माविका छात्राहरु ऋचानक बेहोस हुन थालेपछि विद्यालयको पठनपाठन बन्द गरिएको छ । हिजो र आज लगातार विद्यार्थी बेहोस हुने क्रम बढेपछि दुई दिन विद्यालय बन्द गरिएको विद्यालयले जनाएको छ ।
विद्यालयमा कक्षा ६ देखि ९ सम्म अध्ययनरत छात्राहरुमा बेहोस हुने समस्या देखिएको विद्यालयका प्रधानाध्यापक दीपक भट्टराईले जानकारी दिनुभयो । उहाँका अनुसार आईतबार विद्यालयमा प्रार्थना समयमा ६ जना छात्राहरु बेहोस् भएका थिए । आज विद्यालय शुरु हुनै लाग्दा थप दश जना छात्राहरु बेहोस् भएपछि पृथ्वीचन्द्र अस्पतालमा उपचारका लागि पठाईएको प्रधानाध्यापक भट्टराईले बताउनुभयो ।
रोग पत्ता नलागेपछि अन्य विद्यार्थीहरुलाई संक्रमण नहोस् भनेर नगरपालिकाको समन्वयमा विद्यालय आज र भोली बन्द गर्ने निर्णय गरिएको विद्यालयले जनाएको छ । अस्पतालमा हाल दश जना छात्राहरु उपचारमा रहेको र संख्या बढ्दै गएको पृथ्वीचन्द्र अस्पतालका मेसु डा.मोहम्मद नुरुल होदाले जानकारी दिनुभयो । हिजो आएका तीन जनालाई उपचार पछि घर पठाईएको र आज दश जनाको उपचार भईरहेको उहाँले बताउनुभयो । यो मास हिस्टेरिया हुन सक्ने भएकोले विद्यालयमै पुगेर अध्ययन गरिने उहाँले बताउनुभयो । मानसिक समस्याका कारण यस किसिमको रोग देखिने भएकोले स्वास्थ्यकर्मी परिचालन गरेर विद्यालयका शिक्षक, अभिभावकलाई काउन्सिलिङ गर्न लागिएको उहाँले बताउनुभयो ।